Read Caribbean Javanese Ayub 11 Bible Online

Ayub 11 - Caribbean Javanese bible

Ayub 11

¹Sofar wong Naama terus nyauri tembungé:

²“Wong kakèhan rembukan kuwi apa ora kudu disemauri? Apa wong sing kakèhan omong kuwi kudu dianggep bener?

³Apa wong kudu meneng waé krungu otyèhanmu kuwi? Lan yèn kowé ngèlèk-èlèk kuwi apa ora ana sing melèhké?

⁴Kowé ngomong: Piwulang kula kuwi murni, lan kula resik ing mripat Panjenengan.

⁵Nanging supaya Gusti Allah déwé gelem mréntahké tembungé, lan mbukak ilaté kanggo kowé,

⁶lan ngekèki weruh marang kowé bab wewadiné kawityaksanan, awit kuwi isiné anèh. Kowé terus bakal weruh, yèn Gusti Allah ora ngitung kesalahanmu sak bagéan.

⁷Apa kowé bisa njajaki kahanané Gusti Allah, apa bisa weruh wates-watesé pangwasané sing Mahakwasa?

⁸Iki duwuré pada karo langit; - kowé bisa nindakké apa? Jeruné ngungkuli panggonané wong mati: - kowé ngerti apa?

⁹Dawané ngungkuli ukurané bumi, jembaré ngungkuli segara.

¹⁰Yèn Panjenengané liwat, terus nyekel lan ngadili, sapa sing bisa ngalang-alangi?

¹¹Awit Panjenengané weruh tukang ngapus lan ngerti sing ala tanpa ngewaské.

¹²Yèn wong bodo bisa ngerti, anaké kimar alas ya bisa lair dadi manungsa.

¹³Yèn atimu kok tyepakké, terus megarké tanganmu marang Panjenengané,

¹⁴lan ala ing tanganmu kuwi kok edohké, lan kowé ora nglilani duraka manggon ing tarupmu,

¹⁵kowé mesti terus bisa ndangak karo tanpa tyiri, nganti kuwat lan ora bakal wedi,

¹⁶kowé malah terus lali marang kasusahanmu, kuwi mung kok ilingi kaya banyu sing wis kepungkur miliné.

¹⁷Uripmu padangé bakal ngungkuli wayah tengah awan, pepeteng bakal dadi padang kaya ésuk.

¹⁸Kowé bakal rumangsa tentrem, awit ana pengarep-arep; sakwisé mriksa ngiwa nengen terus bakal turu kepénak;

¹⁹enggonmu nglèyèh turu ora bakal ana sing ngrusuhi, lan okèh wong sing pada njaluk dimelasi karo kowé.

²⁰Nanging mripaté wong duraka mesti bakal dadi lamur, mulané pada ora bisa mlayu nylametké menèh; sing dadi pengarep-arepé mung pegaté nyawané.”