Read Caribbean Javanese Ayub 12 Bible Online

Ayub 12 - Caribbean Javanese bible

Ayub 12

¹Ayub terus nyauri, tembungé:

²“Lah ya kowé kuwi sing jenengé manungsa, yèn kowé pada mati, kawityaksanan ya mati bebarengan karo kowé.

³Aku ya nduwé pikiran kaya kowé, aku ora kalah karo kowé; sapa sing durung tau weruh sing kaya mengkono kuwi?

⁴Aku iki dadi guyonan sak pepadaku, aku sing menawa sambat marang Gusti Allah terus dituruti, wong sing apik lan bener dadi guyonan.

⁵Sangka panemuné wong sing tentrem uripé, wong sing sangsara kuwi pantesé dityatyat, kuwi kaya gebuk kanggo wong sing sikilé kejengklok.

⁶Tarupé wong sing tukang ngrusak pada tentrem lan wong sing nangèkké nesuné Gusti Allah pada ngalami katentreman, mengkono uga para wong sing arep nggegem Gusti Allah ing tangané.

⁷Nanging takon ta marang kéwan, kuwi mesti pada didunungké marang kowé, lan takon ta marang manuk ing awang-awang, mesti kowé diduduhké,

⁸utawa ngomonga marang bumi, kuwi mesti bakal ngekèki piwulang marang kowé, uga iwak ing segara bakal nyritakné marang kowé.

⁹Tunggalé kuwi kabèh sapa sing ora weruh, yèn tangané Gusti Allah sing nindakké kuwi;

¹⁰yèn nyawané kabèh sing urip lan napasé saben manungsa kuwi manggon ing tangan-Né?

¹¹Kuping apa ora nguji tembung-tembung, kaya tyetak enggoné ngrasakaké pangan?

¹²Apa duduk para wong tuwa sing pada kanggonan kawityaksanan, lan wong sing wis okèh umuré kuwi sing nduwé pangertèn?

¹³Nanging Gusti Allah kuwi sing nduwé kawityaksanan lan pangwasa. Ya Panjenengané kuwi sing dadi sumberé timbangan pikiran lan kapinteran.

¹⁴Yèn Panjenengané mbungkar, ora ana sing bisa mbangun menèh. Yèn Panjenengané nyekel wong, ora ana sing bisa ngluwari.

¹⁵Yèn Panjenengané mbendung banyu, terus asat kabèh. Yèn Panjenengané nglilani mili menèh, terus ngelepi bumi.

¹⁶Panjenengané nggawa pangwasa lan kemenangan ya sing ngwasani wong sing kesasar lan wong sing nasarké.

¹⁷Panjenengané sing nggiring lan ngudani para mentri, lan sing nggawé bodoné para rèkter.

¹⁸Panjenengané sing ngutyuli tali banda sing dipasang karo para ratu, sing terus pada ditalèni bangkèkané karo tali peniset.

¹⁹Panjenengané sing nggiring lan ngglédahi para imam, lan nggolingké wong sing kuwat.

²⁰Panjenengané sing mbungkem tyangkemé para wong sing dipertyaya, lan para wong tuwa pada diilangi nalaré.

²¹Panjenengané sing nekakké wirang para wong luhur lan sing ngutyuli sabuké para wong sing kuwat.

²²Panjenengané sing mbukak wewadiné pepeteng lan nekakké peteng ndedet ing pepadang.

²³Panjenengané sing ndadèkké tangkar-tumangkaré lan tumpesé para bangsa, lan sing nggawé tambah-tambahé bangsa terus diboyong.

²⁴Panjenengané sing nggawé para penggedéné ndonya pada ilang akalé lan kesasar ing ara-ara samun sing ora ana dalané,

²⁵pada gagap-gagap ing pepeteng sing ora ana pepadangé; uga pada digawé gloyoran kaya wong mendem.”