Read Caribbean Javanese Ayub 13 Bible Online

Ayub 13 - Caribbean Javanese bible

Ayub 13

¹“Lah kuwi kabèh wis tak deleng karo mripatku, tak rungokké karo kupingku lan tak mengertèni.

²Apa sing pada kok ngerti, aku ya ngerti, aku ora kalah karo kowé.

³Nanging aku arep ngomong marang sing Mahakwasa, aku kepéngin mbélani perkaraku ing ngarepé Gusti Allah.

⁴Nanging kowé kabèh kuwi wong sing pada nutupi gorohmu, lan pada dadi dukun sing palsu.

⁵Yèn kowé pada meneng babar pisan, kuwi malah dadi kawityaksananmu.

⁶Rungokna ta semaurku lan gatèkna jawabané lambéku!

⁷Apa kowé gelem goroh kanggo Gusti Allah, apa kowé gelem ngapusi kanggo Panjenengané?

⁸Apa kowé gelem mbélani Gusti Allah lan bantahan kanggo mbélani Panjenengané?

⁹Apa apik, yèn Panjenengané sing mriksa marang kowé? Apa kowé bisa ngapusi Panjenengané kaya ngapusi wong?

¹⁰Kowé bakal pada diukum abot yèn kowé mbélani karo meneng-meneng.

¹¹Apa kamulyané Gusti Allah kuwi ora bakal ngagètké kowé, lan apa kowé ora bakal ketiban rasa wedi?

¹²Pepéling-pepélingmu kuwi wulang bebasan lebu lan tamèngmu kuwi tamèng lempung.

¹³Pada menenga! Aku arep ngomong, senajan apa waé sing bakal ditibakké marang aku, tak sanggané!

¹⁴Dagingku arep tak jupuk karo untuku, lan nyawaku arep tak sangga karo tanganku.

¹⁵Delengen, Panjenengané arep matèni aku, aku wis ora nduwé pengarep-arep, nanging aku arep mbélani ing bab mlakuku ing ngarepan-Né.

¹⁶Panjenengané bakal dadi keslametanku, nanging wong lamis ora kena ngadep ing ngarepé.

¹⁷Rungokna sing tenanan tembung-tembungku, lan gatèkna tegesé!

¹⁸Ngertia, aku wis nyawiské perkaraku, aku yakin, yèn aku bener.

¹⁹Sapa sing kuwat padu karo aku, ya wis, aku tak meneng waé terus tak mati.

²⁰Mung rong perkara supaya aja Panjenengan nindakké marang aku, dadi aku ora bakal ndelik sangka ngarepé Panjenengan,

²¹ya kuwi: Tangan-Né supaya disingkirké sing adoh sangka kula, lan uga rasa gemeter marang Panjenengan aja ditibakké marang kula,

²²terus Panjenengan supaya nyeluk kula, kula ya bakal nyauri; utawa kula sing ngomong lan Panjenengan sing nyauri.

²³Sak pira ta gedéné kesalahan lan dosa kula? Kula supaya Panjenengan nduduhké marang panerak lan dosa kula.

²⁴Apa sebabé Panjenengan nganti ndelikké praupan Panjenengan lan kula Panjenengan anggep mungsuh?

²⁵Godong kabur kanginan kok Panjenengan nggawé gemeter; damèn garing kok Panjenengan uber-uber!

²⁶Awit kula Panjenengan tibani sing pait getir, kesalahan waktu nom-noman kula kuwi Panjenengan tibakké marang kula,

²⁷taleré kula Panjenengan ranté, lan sak mlaku kula Panjenengan ulat-uletké, tlapakané kula Panjenengan pasangi palangan,

²⁸nanging kuwi kanggo wong sing wis ringkih kaya kayu gapuk, kaya mori sing dipangan karo rayap.”