Read Caribbean Javanese Ayub 14 Bible Online

Ayub 14 - Caribbean Javanese bible

Ayub 14

¹“Manungsa sing lair sangka wong wadon, tyendek umuré, warek karo kasusahan,

²mekar kaya kembang terus alum, ilangé kaya ayang-ayang, ora bisa lestari.

³Apa ya Panjenengan bakal gelem weruh wong sing kaya mengkéné kuwi lan bakal Panjenengan gèrèt menyang pengadilan Panjenengan?

⁴Apa tau ana wong resik tukulé sangka wong reget? Siji waé mesti ora ana!

⁵Kanggo kuwi umuré manungsa wis dipestèkké watesé, lan tyatyahé sasiné wis Panjenengan temokké, apa menèh wates-watesé wis Panjenengan tetepké, terus ora bisa kelangkahan,

⁶mila Panjenengan supaya gelem ménguh, supaya dèwèké bisa lèrèn, terus bisa ngrasaké énaké dina kaya wong buruh.

⁷Awit kanggo wit-witan ijik ana pengarep-arep; yèn ditegor, metu trubusan malih, banjur urip ing sak terusé.

⁸Senajan oyoté dadi tuwa ing njeruhné lemah, lan tunggaké nganti mati manggon ing lebu,

⁹nanging angger mambu banyu, mesti semi lan metu pangé sing dadi tanduran anyar.

¹⁰Nanging yèn wong nemoni pati wis ora nduwé daya kekuwatan menèh; manungsa yèn wis mati, wong iki terus ing ngendi?

¹¹Kaya banyuné tlaga sing nguwab lan kali sing asat lan mati,

¹²mengkono uga manungsa ya ambruk lan ora tangi menèh, nganti tekan ilangé langit pada ora tangi utawa digugah anggèné turu.

¹³Nanging beja kula yèn Panjenengan gelem ndelikké kula ing panggonané wong mati; yèn Panjenengan gelem ngaling-alingi kula nganti mandeké bebendu Panjenengan lan yèn Panjenengan gelem netepaké waktu terus Panjenengan éling marang kula!

¹⁴Manungsa yèn wis mati, apa bisa urip menèh? Yèn mengkéné kula nduwé pengarep-arep sak suwéné kula ngalami kangèlan, nganti tekan giliran kula.

¹⁵Panjenengan terus bakal nyeluk kula, lan kula bakal nyauri; Panjenengan bakal kangen marang penggawéané tangan Panjenengan.

¹⁶Panjenengan terus ora bakal nggatèkké dosa kula, senajan Panjenengan ngitung jangkah kula,

¹⁷panerak kula terus pada dilebokké ing kantong sing diségel, lan Panjenengan bakal nutupi rapet kesalahan kula.

¹⁸Nanging kaya gunung sing ambruk terus ajur, lan watu sing ngalih panggonan,

¹⁹lan kaya banyu sing nggripiské watu, lan banteré iliné ngéntérké lebuné lemah, ya kaya mengkono enggèn Panjenengan nglebur pengarep-arepé manungsa.

²⁰Manungsa Panjenengan kwasani sak lawasé terus lunga piyambaké, Panjenengan owahi praupané terus Panjenengan tundung;

²¹ora weruh enggoné anak-anaké pada olèh kamulyan, utawa pada tiba ing ala ya ora dimangertèni.

²²Mung awaké sing njalari dèwèké ngalami perih, lan awit sangka dèwèké déwé, nyawané ngalami sedih.”