Read Caribbean Javanese Ayub 16 Bible Online

Ayub 16 - Caribbean Javanese bible

Ayub 16

¹Ayub terus nyauri, semauré:

²“Wis kerep banget aku krungu sing kaya mengkono kuwi, kowé kabèh kuwi juru panglipuran sing apes!

³Apa durung entèk tembungmu sing tanpa isi kuwi? Apa ta sing meksa kowé supaya nglawan?

⁴Aku ya bisa ngomong kaya kowé, yèn kowé kuwi dadi kaya aku; aku bisa ngratyik tetembungan sing apik kanggo kowé lan gèdèk-gèdèk ngrasakaké kowé.

⁵Aku bisa nguwatké atimu karo tutuk lan lambéku ora tak endek enggoné ngutyapké balesan.

⁶Nanging yèn aku ngomong, enggonku ngalami sangsara ora bakal dadi èntèng lan yèn aku meneng apa ya ana sudané?

⁷Nanging saiki Panjenengané ndadèkké aku tanpa kekuwatan lan ngrusak sak isiné omahku,

⁸aku dityekel; iki sing dadi seksi; enggonku kuru iki kaya-kaya terus ngadek nggugat marang aku.

⁹Nesuné Gusti Allah nyerang lan nglawan marang aku, nggeget waja tumuju marang aku, aku dipandeng karo mungsuhku karo mripat mentyereng.

¹⁰Wong pada tyrèwèt tyangkemé kanggo aku, aku ditapuk karo sing ngisinké, pada nggrombol arep ngroyok aku.

¹¹Gusti Allah masrahké aku marang wong dursila, lan masrahaké aku marang tangané wong duraka.

¹²Aku urip tentrem, nanging aku terus disengsarakké, gitokku dityekel terus aku dibanting, terus ditangèkké didadèkké sasaran-Né.

¹³Aku diudani karo panah, ginjelku pada dityublesi tanpa kawelasan, rempelaku dikutahké ing bumi.

¹⁴Aku dijuwing-juwing, aku dilawan kaya déné suradadu ing perang.

¹⁵Aku wis ndondomi salin kasusahan kanggo nutupi kulitku lan sunguku tak uruki lebu.

¹⁶Praupanku kétok abang awit sangka nangis lan mripatku ketutupan karo peteng ndedet,

¹⁷senajan tanganku ora kanggonan tumindak dursila lan pandongaku resik.

¹⁸Hé! bumi, getihku aja kok tutupi, lan jeritanku aja nganti olèh panggonan lèrèn!

¹⁹Ngertia, saiki uga Seksiku ing swarga, sing nyeksèni aku ing nduwur.

²⁰Senajan aku dipoyoki karo kantya-kantyaku nanging karo nangis mripatku melèk marang Gusti Allah,

²¹supaya Panjenengané gelem ngrampungké perkara ing antarané manungsa lan Gusti Allah lan manungsa lan sak pepadané.

²²Awit gunggungé taun mung kèri setitik lan aku bakal metu ing dalan sing ora bakal tak balèni menèh.