Read Caribbean Javanese Ayub 18 Bible Online

Ayub 18 - Caribbean Javanese bible

Ayub 18

¹Ing kono Bildad, wong Suah terus nyauri, tembungé:

²“Nganti pira suwéné enggonmu ndawaké tembung; pikiranmu kanggokna ta, aku terus arep pada ngekèki pitutur.

³Kenèng apa aku kok pada dianggep kéwan? Kenèng apa aku pada kok anggep bodo?

⁴Kowé sing nyuwèk-nyuwèk awakmu déwé ing sak njeruhné nesumu, apa awit sangka kowé bumi bakal dadi suwung lan gunung watu mingset sangka panggonané?

⁵Senajan mengkono pepadangé wong ala bakal dipatèni, lan urupé geniné ora semlorot.

⁶Pepadang ing sak njeruhné tarupé dadi peteng, lan dimaré ing nduwuré mati.

⁷Jangkahé sing kuwat dialang-alangi, lan pamikiré déwé njalari tibané,

⁸awit sikilé déwé ndadèkké mlebu ing jaring, lan mlakuné liwat ing tutupé juglangan pasangan.

⁹Tungkaké kena ing jiret, lan mlakuné terus mandek awit mlebu ing jiret.

¹⁰Jalaran dipasangi tali sing kependem ing lemah, dalan sing diliwati dipasangi jiret.

¹¹Ing sak paran-parané tansah katekan kagèt lan diuyak karo rasa wedi,

¹²tansah dadi kepénginané kasangsaran, lan karusakan ngentèn-entèni wantyi tibané.

¹³Kulité awaké dipangan karo lara, malah sak kujur awaké pada dipangan karo lelara sing nekaké pati.

¹⁴Dèwèké disèrèt sangka tarupé, - nanging kuwi panggonan sing nentremaké - terus digawa menyang ratuné rasa wedi.

¹⁵Ing tarupé mung kèri apa sing ora ana gegandengané karo dèwèké; panggonané kesawuran lirang.

¹⁶Oyoté ing ngisor pada garing, lan pangé ing nduwur pada alum.

¹⁷Pengéling-éling kanggo dèwèké entèk sangka bumi, ing dalan-dalan jenengé wis ora disebut.

¹⁸Dèwèké ditundung sangka pepadang menyang pepeteng, lan ditundung sangka ndonya,

¹⁹ora bakal nduwé anak utawa putu ing sak tengahé bangsané, lan wong siji waé ora ana sing tetep urip ing panggonané.

²⁰Wong-wong kulon bakal nggumun ing bab patiné, lan wong-wong wétan[3] bakal pada wedi.

²¹Ya kaya mengkono kuwi kedadian panggonané wong sing mlakuné nyasar, lan ya kaya mengkono kuwi kedadiané panggonané wong sing ora nganggep marang Gusti Allah.”