Read Caribbean Javanese Ayub 19 Bible Online

Ayub 19 - Caribbean Javanese bible

Ayub 19

¹Ing kono Ayub terus nyauri, tembungé:

²“Nganti pira suwéné enggonmu pada nglarakké atiku lan ngremuk aku karo tetembungan?

³Saiki wis kaping sepuluh enggonmu ngrèmèhké aku, kok ora isin nglarani aku.

⁴Yèn aku iki pantyèn kesasar, apa ora aku déwé sing nanggung enggonku kesasar kuwi.

⁵Yèn kowé tenan-tenan arep ngegung-ngegungké uripmu ing ngarepku, lan tyatyatku kok gawé bukti kanggo aku,

⁶pada ngertia, yèn Gusti Allah wis nandangi ora adil marang aku, lan aku dikrukup karo jaringé.

⁷Lah aku mbengok: ‘Penindesan!’ nanging ora ana sing nyauri. Aku sambat njaluk tulung, nanging ora ana pengadilan.

⁸Dalanku dialang-alangi karo témbok, terus aku ora bisa liwat, lan dalan-dalanku didadèkké peteng.

⁹Kaluhuranku karo Panjenengané wis didèdèli, lan makutaku wis dirampas sangka sirahku.

¹⁰Aku dibongkar babar pisan terus aku entèk, lan pengarep-arepku dijebol kaya wit-witan.

¹¹Bebenduné marang aku mulat-mulat, aku dianggep mungsuhé.

¹²Suradaduné maju bebarengan, ngalang-alangi dalan nglawan marang aku, terus ngepung tarupku.

¹³Sedulurku pada didohké sangka aku, lan kantya-kantyaku pada pangling babar pisan marang aku.

¹⁴Sanak sedulurku pada ngedoh lan kantyaku pada lali marang aku.

¹⁵Wong-wong sing tunggal sak omah karo aku lan para batur wadon pada ngarani aku wong liyané, lan nganggep aku wong mantya.

¹⁶Baturku tak undang, ora semaur, ndadak kudu tak bujuk karo tembung alus.

¹⁷Bojoku ora betah mambu ababku, lan ambuku bosok kanggo para sedulurku tunggal bapak ibu.

¹⁸Uga botyah-botyah pada ngrèmèhké aku; yèn aku arep ngadek terus diisin-isin.

¹⁹Kabèh kantyaku sing apik pada mukok weruh aku, lan sing tak trésnani pada ninggal aku.

²⁰Kulit lan dagingku pada kelèt karo balungku mung kèri gusiku sing ijik.

²¹Melasa marang aku, melasa marang aku, hé, kantya-kantyaku, awit aku digepok karo tangané Gusti Allah.

²²Kenèng apa kowé pada ngoyak-oyak aku, kaya Gusti Allah lan kok ora warek enggonmu mangan dagingku?

²³Aduh, supaya tembung-tembungku ditulis dityateti ing kitab,

²⁴ditatah karo wesi kanggo ngukir lan timbel ing gunung watu kanggo ing sak lawas-lawasé.

²⁵Nanging aku weruh: Penebusku kuwi urip, lan ing pungkasané Panjenengané bakal tangi ing lebuné bumi.

²⁶Uga sakwisé kulité awakku rusak banget, nanging sangka dagingku aku bakal weruh Gusti Allah,

²⁷sing bakal tak deleng déwé kuwi bakal mbélani aku; mripatku déwé sing weruh, duduk wong liyané; telengé atiku banget enggoné kangen.

²⁸Yèn kowé pada ngomong: ‘Aku bakal pada nuntut marang dèwèké,’ lan bakal weruh sebabé perkarané,

²⁹pada wedia marang pedang, awit nesu kuwi nekaké ukuman pedang, supaya kowé pada ngertia yèn tenan ana pengadilan.”