Read Caribbean Javanese Ayub 22 Bible Online

Ayub 22 - Caribbean Javanese bible

Ayub 22

¹Elifas, wong Téman terus nyauri, tembungé:

²“Manungsa kuwi apa maédahi kanggo Gusti Allah? Ora, wong sing nduwèni kepinteran kuwi mung migunani kanggo awaké déwé.

³Yèn kowé bener apa ana paédahé kanggo sing Mahakwasa, utawa yèn uripmu kuwi apik, apa Panjenengané olèh untungé?

⁴Apa awit sangka pangabektimu enggonmu kesiksa lan dilungakké pengadilan karo Panjenengané?

⁵Apa ora awit sangka gedéné penggawé alamu lan tanpa itungan kesalahanmu?

⁶Awit karo sak wenang-wenang enggonmu nampani gadèn sangka sedulur-sedulurmu, lan ngrampas sandangané para wong mlarat.

⁷Wong sing ngelak ora kok wènèhi ngombé, wong sing kaliren ora kok wènèhi mangan,

⁸nanging wong sing kuwat kuwi sing nduwèni bumi, lan wong sing luhur-luhur kuwi sing ngenggoni.

⁹Randa-randa pada kok tundungi nglentung lan tangané botyah-botyah lola pada kok remuk.

¹⁰Mulané kowé dikala-kala ing kiwa-tengenmu, lan dadakan kena karo rasa wedi.

¹¹Padangmu dadi peteng terus kowé ora bisa weruh, lan terus keleb ing banjir.

¹²Gusti Allah apa ora njagong ing langit sing duwur? Delengen ta lintang-lintang sing duwur déwé, ora ana sing ngungkuli duwuré!

¹³Nanging tembungmu: Gusti Allah ngerti apa? Apa Panjenengané bisa ngadili sangka sak nduwuré mendung-mendung sing peteng?

¹⁴Panjenengané ketutupan karo mendung nganti ora bisa weruh; Panjenengané mlaku-mlaku ing sak dawané langit.

¹⁵Apa kowé arep tetep mlaku ing dalan sing lawas, sing dilakoni karo para wong ala,

¹⁶sing wis pada disendal sak durungé waktuné, sing lemahé katut kebanjiran,

¹⁷sing pada nduwé tembung marang Gusti Allah: Minggira sangka aku, Sing Mahakwasa bisa ngapakké aku?

¹⁸Senajan mengkono ya Panjenengané kuwi sing ngebaki omahé karo samubarang sing apik - nanging rantyamané wong duraka kuwi adoh sangka aku.

¹⁹Para wong bener pada weruh lan pada bungah; lan wong sing tanpa kesalahan pada moyoki, tembungé:

²⁰Tenan, mungsuhku wis entèk, lan apa sing kok tinggal wis entèk dipangan karo geni.

²¹Rukuna marang Gusti Allah supaya kowé tentrem; karo mengkono kowé bakal olèh kabekjan.

²²Tampanana piwulangé tutuké, lan tembungé simpenen ing sak njeruhné atimu.

²³Yèn kowé mratobat marang sing Mahakwasa lan ngasorké urip; yèn kowé ngedohké sing ala sangka tarupmu,

²⁴mbuwang wiji emas ing lebu emas Ofir ing sak tengahé watu-watu ing kali,

²⁵lan yèn sing Mahakwasa kuwi dadi tumpukanmu emas lan slakamu sing apik,

²⁶ing kono kowé mesti ngrasakaké kesenengan awit sing Mahakwasa lan bakal ndangak marang Gusti Allah.

²⁷Yèn kowé ndedonga marang Panjenengané, mesti dituruti, lan kowé bakal mbayar tembung-janjimu.

²⁸Yèn kowé mutusi arep nindakké sakwijiné bab, mesti bakal kelakon kekarepanmu lan dalan-dalanmu bakal keslorotan karo padangé pepadang.

²⁹Awit Gusti Allah kuwi ngasorké wong sing sombong nanging ngganjar keslametan marang wong sing ndingklukké sirahé.

³⁰Wong sing ora kesalahan bakal dipitulungi, mengkono uga enggonmu olèh pitulungan kuwi awit sangka resiké tanganmu.”