Read Caribbean Javanese Ayub 23 Bible Online

Ayub 23 - Caribbean Javanese bible

Ayub 23

¹Nanging Ayub nyauri, tembungé:

²“Saiki sambatku dadi pambruntakan, tangané menet aku, terus aku sambat.

³Ah, supaya aku bisa weruh kepriyé enggonku ketemu karo Panjenengané, lan dililani nemoni ing omahé.

⁴Aku terus bakal njlèntrèhké perkaraku ing ngarepé, lan tutukku bakal tak kebaki tembung jawaban.

⁵Aku mesti bakal weruh tembung-balesan sing dikèkké marang aku, lan aku bakal ngerti, apa sing diomongké marang aku.

⁶Apa Panjenengané sing Mahakwasa kuwi gelem nganakké perkara karo aku? Ora, Panjenengané mesti bakal weruh aku.

⁷Wong sing jujur kuwi sing bakal nglawan padu ing ngarepé, lan aku mesti bakal utyul sak lawas-lawasé sangka rèkterku.

⁸Yèn aku mlaku mengétan, Panjenengané ora ing kana, utawa mengulon, aku ora nemoni Panjenengané.

⁹Tak golèki ngalor, Panjenengané ora kétok; gentèn ngidul, aku ora weruh Panjenengané.

¹⁰Dasaré Panjenengané weruh mlakuné uripku; yèn aku diuji, kaya emas enggonku metu.

¹¹Sikilku tetep ngetutké mlakuné, aku mlaku ing dalané lan ora bakal nyimpang.

¹²Préntah sing lair sangka ilaté ora tak terak; préntahé tutuké tak simpen ing sak njeruhné atiku.

¹³Nanging Panjenengané ora tau malih - Sapa sing bisa ngalang-alangi Panjenengané? Apa sing dikarepké, ya terus ditindakké.

¹⁴Awit Panjenengané bakal ngrampungké apa sing wis ditetepaké kanggo aku, lan ijik okèh bab liyané sing kaya mengkono sing dikarepké.

¹⁵Mulané atiku gemeter ing ngarepé, yèn kuwi kabèh tak pikir, aku terus wedi banget marang Panjenengané.

¹⁶Gusti Allah wis nggawé aku semplak sing Mahakwasa wis nggawé atiku gemeter,

¹⁷awit aku entèk ora awit sangka pepeteng, lan uga ora awit sangka praupanku ketutupan karo peteng ndedet.”