Read Caribbean Javanese Ayub 24 Bible Online

Ayub 24 - Caribbean Javanese bible

Ayub 24

¹“Kenèng apa waktuné pengadilan ora ditemtokké karo sing Mahakwasa? Kenèng apa wong sing ngabekti ora weruh dinané pengadilan?

²Ana wong sing pada ngowahi watesé lemah, sing ngrampas kumpulan kéwan terus diengon déwé.

³Kimaré botyah lola dilungakké lan sapiné wédok duwèké randa digadé.

⁴Wong mlarat pada singkang-singkang, wong kasusahan ing sak njeruhné negara kepeksa pada ndelik kabèh.

⁵Lah kaya kimar alasan ing ara-ara samun enggoné pada metu arep nyambutgawé golèk pangan ing tanah bera kanggo anak-anaké.

⁶Ing kebon pada njupuki pangé kéwan, lan ing kebon angguré, anggur wong ala pada woh turahé.

⁷Pada nginep karo wuda, awit ora nduwé sandangan, lan ora nduwé kemul ing waktu adem;

⁸pada klebes awit sangka deresé udan ing pegunungan, lan awit ora ana panggonan kanggo ngiyup, terus kepeksa ndepipis ing watu.

⁹Ana sing ngrebut botyah lola sangka susuné ibuné, lan nggadé bayiné wong mlarat.

¹⁰Pada kluyuran karo wuda, tanpa sandangan, lan pada mikul gandèng-gandèngan gandum karo kaliren.

¹¹Pada nggawé lenga ing antarané kebon rong gutek pada ngiles-ngiles tanduran anggur karo ngelak.

¹²Pada krungu sambaté wong-wong sing wis arep mati sangka kuta, lan jeritané wong-wong sing ngalami tatu, nanging Gusti Allah ora ngrungokké pandongané.

¹³Ana menèh golongan sing nyatru marang pepadang sing ora weruh marang dalané Gusti Allah lan ora tetep mlaku ing sak uruté dalan pituduhé.

¹⁴Sak durungé wayah ésuk mruput tumindak ala tandang matèni wong kasusahan lan wong mlarat, nanging yèn mbengi tumindaké kaya maling.

¹⁵Wong sing laku bédang ngentèni wayah soré, awit: Aku aja nganti diweruh karo wong; terus praupané dikudungi.

¹⁶Yèn peteng pada mbobol omah, yèn awan pada ndelik, ora gelem weruh pepadang,

¹⁷awit kanggo wong-wong kuwi peteng kuwi ésuk, lan wis pada kulina marang peteng ndedet sing medèni.

¹⁸Pada kèli ing nduwuré banyu, bagéané ing bumi kena ing ipat-ipat; pada ora ing kebon angguré menèh.

¹⁹Banyuné salju dientèkké karo ketiga ngerak lan panasé srengéngé, kaya mengkono uga tumindaké ndonyané wong mati marang wong sing nglakoni dosa,

²⁰wis ora diéling karo wetengé ibuné, dikrikitti karo sèt ora ana sing ngélingi, dadiné duraka kuwi tugel kaya wit-witan.

²¹Wong sing ngrayah duwèké wong gabuk sing ora nduwé anak, lan ora nggawé apik marang randa,

²²malah wong-wong rosa-rosa pada disèrèt karo kekuwatané; kuwi tangi menèh, nanging uripé ora ana sing dijagakké.

²³Gusti Allah ngekèki katentreman sing dadi gondèlané, lan weruh sak mlakuné.

²⁴Mung sedilut enggoné pada tekan nganti duwur nanging terus wis ora ana. Pada diasorké terus dadi alum kaya samubarang kabèh, terus tugel kaya putyuké damèn.

²⁵Yèn ora mengkono anané, sapa sing wani nesoni aku lan ngilangké omonganku?”