Read Caribbean Javanese Ayub 27 Bible Online

Ayub 27 - Caribbean Javanese bible

Ayub 27

¹Ayub neruské rembukané, tembungé:

²“Kanggo Gusti Allah sing ora ngekèki keadilan marang aku lan kanggo sing Mahakwasa sing nindakké pait-getir marang nyawaku,

³selawasé ambekanku durung suda, lan napasé sangka Gusti Allah ijik ing irungku,

⁴lambéku tenan ora bakal ngutyapké sing goroh lan ilatku ora bakal nglairké sing ala.

⁵Aku babar pisan ora mbenerké kowé! Nganti aku mati aku tetep ngwasani, yèn aku ora salah.

⁶Kebeneranku tak gondèli kentyeng lan ora bakal tak etyulké; atiku ora bisa nyalahké dinané uripku siji-sijia.

⁷Mungsuhku bèn ngrasakaké kaya wong duraka, lan wong sing nglawan marang aku kaya wong lityik.

⁸Awit apa ta pengarep-arepé wong duraka, yèn Gusti Allah ngomong lan njupuk uripé?

⁹Apa Gusti Allah bakal ngrungokké jeritané, yèn katekan kangèlan?

¹⁰Apa bisa seneng-seneng awit sangka sing Mahakwasa lan tansah nyebut marang Gusti Allah?

¹¹Aku arep ngekèki weruh marang kowé bab tangané Gusti Allah, apa sing dikarepké karo sing Mahakwasa ora bakal didelikké.

¹²Sak beneré kowé kabèh wis pada weruh déwé; kenèng apa kowé pada mikir sing ora-ora?

¹³Ya iki pandumané wong duraka sing ditemtokké karo Gusti Allah, lan ganjarané wong dursila pawèhé sing Mahakwasa:

¹⁴yèn anaké dadi okèh pada dadi pangané pedang lan anak putuné bakal kekurangan pangan.

¹⁵Nanging sing ijik urip bakal medun ing kuburan awit sangka memala, ora ditangisi karo randané.

¹⁶Yèn numpuk banda tyatyahé nganti kaya lebu, lan numpuk sandangan nganti kaya lempung,

¹⁷senajan dèwèké sing numpuk, nanging sing nganggo wong sing bener, lan wong sing ora salah sing bakal ngedum-edum duwité kuwi.

¹⁸Enggoné ngedekké omah kaya jaringé kalamangga, kaya gepuk gawéané tukang jaga.

¹⁹Enggoné nglèyèh kaya wong sugih, nanging kuwi ora bakal kelakon menèh, bareng melèké mripaté, samubarang kabèh wis ora ana.

²⁰Wong mau kena karo rasa wedi kaya tekané banjir, ing wayah mbengi digawa kabur karo lésus,

²¹direbut karo angin wétan nganti entèk, kebuwang sangka panggonané.

²²Dibandemi karo Gusti Allah tanpa welas, karo gugup enggoné ngéndani tangané.

²³Dikeploki karo wong okèh lan disingsoti sangka panggonané.”