Read Caribbean Javanese Ayub 29 Bible Online

Ayub 29 - Caribbean Javanese bible

Ayub 29

¹Ayub terus neruské rembukané, tembungé:

²“Ah, mbok ya aku kaya sasi-sasi sing kepungkur, kaya ing dina waktu Gusti Allah njaga marang aku,

³waktu dian-Né madangi sirahku, lan karo sloroté padangé enggonku mlaku ing pepeteng;

⁴kaya waktu mempeng-mempengé umurku, waktu tarupku kayoman karo gegayutanku marang Gusti Allah,

⁵waktu sing Mahakwasa ijik nunggal karo aku, lan aku dirubung karo anak-anakku,

⁶waktu tlapaké sikilku adus mèlek, lan gunung watu pada metu kaliné lenga ing sak tyedakku.

⁷Yèn aku metu ing gapurané kuta, lan nata jagonganku ing tengahé lapangan,

⁸para nom-noman bareng weruh tekaku terus pada mundur, nanging para wong sing wis uwanen pada ngadek mapan;

⁹para penggedéné pada lèrèn enggoné guneman pada nutupi tutuké;

¹⁰meneng swarané para penggedé, ilaté kelèt ing tyetaké.

¹¹Yèn kuping krungu bab aku, aku terus diarani rahayu, lan saben mripat sing weruh, aku mesti dilem.

¹²Awit wong sing sangsara sing njaluk tulung ya terus tak pitulungi, semono uga botyah lola lan wong sing ora nduwé pitulungan.

¹³Wong sing arep nemu tyilaka ngutyapké berkah marang aku, lan aku nggawé bungahé atiné randa.

¹⁴Kabeneran sing dadi sandanganku lan aku nganggo keadilan kaya jubah lan serban.

¹⁵Aku dadi mripat kanggo wong lamur, lan dadi sikil kanggo wong lumpuh.

¹⁶Aku dadi bapak kanggo wong mlarat, lan perkarané wong sing duduk kantya-kantyaku tak préksa.

¹⁷Wong dursila tak remuk untuné, lan memangsané tak rebut sangka tyangkemé.

¹⁸Pikiranku mengkéné: Aku bakal entèk bareng karo susuhku, lan urip dawa sing kepénak.

¹⁹Oyotku tekan banyu, lan pangé pada diinepi ebun.

²⁰Aku tansah kanggonan kamulyan sing seger, lan gandéwaku pulih nom ing tanganku.

²¹Wong pada ngrungokké sak pituturku karo nganti-anti, pada nampani pituduhku karo meneng.

²²Sak rampungé pituturku, ora ana wong sing ngomong menèh, lan tembung-tembungku pada tumètès marang wong-wong mau.

²³Aku diarep-arep kaya ngentèni tibané udan, lan pada ngangapké tutuké kaya nadahi udan kiriman.

²⁴Pada tak sumèhi yèn pada semplak, lan pada ora bisa nyuremaké padangé praupanku.

²⁵Aku sing netepaké dalané lan dadi pemimpiné. Aku lungguh kaya ratu ing sak tengahé rayat, kaya wong sing nglipur marang sing pada ngalami susah.”