Read Caribbean Javanese Ayub 3 Bible Online

Ayub 3 - Caribbean Javanese bible

Ayub 3

¹Sakwisé mengkono Ayub terus ngomong, nyepatani dina kalairané;

²tembungé mengkéné:

³“Tumpesa dina kalairanku, mengkono uga wengi sing muni: Wis dadi anak lanang ing wetengku.

⁴Dina kuwi dadia peteng, aja dipikir karo Gusti Allah ing nduwur, aja keslorotan pepadang.

⁵Supaya dikebaki karo pepeteng lan ditutup petengé pati, kebuntel karo mendung, dikagètké karo grahanané srengéngé.

⁶Wengi kuwi - ketutup karo peteng ndedet; aja nganti bungah-bungah, ing dina sak njeruhné setaun, aja diitung tyampur karo tyatyahé sasi-sasi.

⁷Lan wengi kuwi tetepa ora ana sing nglairké, lan aja dirungokké swarané kabungahan.

⁸Disumpetana karo para wong sing nyepatani dina, karo wong sing pinter nangèkké nesuné Léwiatan[2].

⁹Lintang-lintang ésuk pada tetep peteng; tanpa gawé enggoné ngentèni tekané pepadang, aja nganti weruh kétoké ésuk wétan,

¹⁰awit ora nutupi lawangé wetengé ibuku, lan ora ngaling-alingi kasusahan ing ngarepé mripatku.

¹¹Kenèng apa aku ora mati waktu lair, lan ora pedot nyawaku waktu metu sangka wetengé?

¹²Kenèng apa ana dengkul sing mangku awakku; lan ana susu sing nusoni aku?

¹³Yèn ora mengkono, aku apa ora bisa lèyèh-lèyèh karo tentrem; bisa turu lan ngasuh

¹⁴tyampur karo ratu lan para imam ing ndonya, sing wis pada mbangun gempuran kanggo piyambaké,

¹⁵lan tyampur karo para penggedéné sing nduwé emas, lan omahé dikebaki slaka,

¹⁶utawa kenèng apa aku ora kaya bayi kluron sing didelikké, kaya bayi sing ora nganti weruh pepadang?

¹⁷Ing kono para wong dursila mandek enggoné nggawé ala, lan para wong sing kentèkan tenaga pada lèrèn.

¹⁸Ing kono para wong tawanan pada olèh katentreman, wis ora krungu swarané sing ngwasani.

¹⁹Wong tyilik lan wong gedé dianggep pada ing kono, lan batur wis luwar sangka bendarané.

²⁰Kenèng apa wong ringkih dikèki pepadang, lan sing kasusahan dikèki urip?

²¹Sing banget kepéngin mati, nanging ora mati-mati, sing enggoné nggolèki ngungkuli wong sing ngeduk banda sing kependem;

²²yèn nemoni kuburané, bungahé luwih banget nganti surak-surak;

²³wong lanang sing dalané kaling-kalingan, ditutupi karo Gusti Allah.

²⁴Awit nggresulaku wis kaya dadi rejekiku, lan sambatku kutah kaya waé banyu.

²⁵Dasar apa sing tak sumelangké, terus nekani aku uga, lan apa sing tak wedèni, ya terus nyerang aku.

²⁶Aku ora bisa ayem lan ora olèh lèrèn utawa tentrem, mung kangèlan sing nekani aku.”