Read Caribbean Javanese Ayub 33 Bible Online

Ayub 33 - Caribbean Javanese bible

Ayub 33

¹“Nanging saiki, hé Ayub, rungokna tembungku, lan rungokké marang tembung-tembungku.

²Ngertia, aku wis mbukak tutukku, ilatku ngomong ing sak ngisoré tyetaku.

³Atiku ngomongké tembung karo jujur, lan lambéku ngomongké karo tyeta apa sing diweruh.

⁴Aku digawé karo Rohé Gusti Allah, lan napasé sing Mahakwasa njalari aku urip.

⁵Yèn kowé bisa, aku semaurana, mapana adep-adepan karo aku.

⁶Sak temené kanggo Gusti Allah aku karo kowé kuwi pada waé, aku ya dibangun sangka lempung.

⁷Mulané kowé aja wedi ing ngarepku, ora abot enggonku bakal menet marang kowé.

⁸Nanging kowé wis ngomong ing sak tyedaké kupingku, lan aku wis krungu enggonmu ngomong mengkéné:

⁹Aku iki resik aku sepi karo panerak, aku sutyi tanpa kesalahan.

¹⁰Nanging Panjenengané olèh alasan kanggo nglawan marang aku, aku dianggep mungsuhé.

¹¹Sikilku dibelok, sak mlakuku tansah didelok.

¹²Semaurku marang kowé: Ing bab kuwi kowé ora bener, awit Gusti Allah kuwi ngungkuli manungsa.

¹³Kenèng apa kowé kok nesoni Panjenengané, awit ora nyauri marang kabèh tembungmu?

¹⁴Awit Gusti Allah enggoné ngekèki tembungé karo tyara siji loro, nanging wong ora nggatèkké.

¹⁵Sak njeruhné impèn, sak njeruhné wahyu ing wayah mbengi, yèn wong turu kepati, yèn lèyèh-lèyèh ing peturon;

¹⁶ing kono Panjenengané mbukak kupingé manungsa lan nggatèkké wong-wong mau karo melèh-melèhké,

¹⁷kanggo pepalang pertingkahé lan kanggo ngilangi gemunggungé,

¹⁸nganti nyawané disingkirké sangka kubur lan uripé sangka lintyipé tumbak.

¹⁹Wong kelakon disenèni karo ngalami lara ing peturonmu, ing sak njeruhné balung-balungé tansah ana rasa lara sing tanpa mandek.

²⁰Nganti wetengé jelèh roti, ilang kekarepané mangan sing énak-énak.

²¹Dagingé susut nganti ora kétok, balung-balungé sing mbiyèn ora kétok, terus pada pating pedégol.

²²Nyawané wis nyedaki kubur, lan uripé nyedaki pati.

²³Yèn ana mulékat ing sandingé, sing dadi penengahé, siji ing antarané 1000, sing dikongkon ngomongké kebenerané manungsa,

²⁴ing kono Gusti Allah bakal ngekèki kawelasan tembungé: Etyulna wong kuwi, supaya aja nganti medun ing kubur, Aku wis olèh tebusan.

²⁵Wong mau terus disegerké awaké kaya wong nom, dadi kaya waktu ijik nom.

²⁶Yèn ndedonga marang Gusti Allah, Panjenengané ya gelem ngrungokké, nganti weruh praupané karo bungah-bungah, lan Gusti Allah terus mbalèkké kebenerané marang manungsa.

²⁷Wong mau terus bakal tyrita marang wong-wong liyané kaya kidung mengkéné: Aku wis nglakoni dosa lan sing jejek wis tak béngkongaké, nanging aku ora kewales.

²⁸Gusti Allah wis mitulungi nyawaku nganti ora tiba ing kubur, lan uripku bakal weruh pepadang.

²⁹Kabèh iki tenan-tenan penggawéané Gusti Allah sing kaping pindo, kaping telu ditibakké marang manungsa,

³⁰karepé mbalèkké nyawané sangka kubur terus keslorotan ing padangé urip.

³¹Hé Ayub, gatèkna, rungokna aku, menenga, aku sing guneman.

³²Yèn ana sing bakal kok omongké, semaurana aku: ngomonga, awit aku kepéngin bisa mbenerké kowé.

³³Yèn ora, rembukanku rungokna; kowé menenga, aku arep ngekèki weruh kawityaksanan marang kowé.”