Read Caribbean Javanese Ayub 35 Bible Online

Ayub 35 - Caribbean Javanese bible

Ayub 35

¹Elihu terus neruské tembungé:

²“Apa iki sing kok anggep adil lan enggonmu ngomong: kebeneranku ing ngarepé Gusti Allah,

³uga pitakonmu sing mengkéné: Kuwi maédahi apa marang aku? Apa keluwihanku yèn ditimbang karo enggonku nglakoni dosa?

⁴Aku sing bakal nyauri kowé lan para kantyamu pisan:

⁵Maraa lan ndangaka ndelok ing langit, delengen mendung-mendung sing ngungkuli kowé kuwi!

⁶Yèn kowé nglakoni dosa, kowé arep nandangi apa ing ngarepé? Yèn panerakmu okèh, kowé nglakoni apa ing ngarepé?

⁷Yèn kowé nandangi bener, kowé ngekèki Panjenengané apa, utawa Panjenengané nampa apa sangka kowé?

⁸Mung wong sing kaya kowé kuwi sing ruginé awit sangka dosamu lan mung anaké manungsa sing olèh untungé awit sangka kebeneranmu.

⁹Wong ngaduh-aduh kuwi awit sangka kokèhan penindes, sambat-sambat awit sangka penindesé para wong sing kwasa;

¹⁰nanging wong ora takon: Ing ngendi Gusti Allah sing nggawé aku, lan sing ngekèki kidung pamuji ing wayah mbengi;

¹¹sing ngekèki kita kepinteran ngungkuli kéwan ing bumi, lan kawityaksanan ngungkuli manuk ing awang-awang?

¹²Ing kono wong pada sambat, nanging Panjenengané ora nyauri, awit sangka gemunggungé para wong ala.

¹³Tenan sambat sing tanpa isi kuwi ora digatèkké karo Gusti Allah lan ora diperduli karo sing Mahakwasa.

¹⁴Saya menèh yèn kowé ngomong, yèn kowé ora weruh Panjenengané, yèn perkaramu wis dipasrahké ing ngarepé,

¹⁵lan kowé kudu ngentèni putusané! Nanging saiki: awit nesuné ora nibakké ukuman lan Panjenengané ora patia perduli marang panerak,

¹⁶Ayub terus ngomong sing tanpa guna, lan tyrèwèt, sing tanpa teges.”