Read Caribbean Javanese Ayub 36 Bible Online

Ayub 36 - Caribbean Javanese bible

Ayub 36

¹Elihu ngomong menèh, tembungé:

²“Sing sabar sedilut engkas, kowé arep tak wulangi, awit ijik ana sing arep tak omongaké atas asmané Gusti Allah.

³Aku arep ngetokké kaweruhku sing muluk-muluk lan mbenerké sing nggawé aku;

⁴awit tenan ora goroh omongku, sing adep-adepan karo kowé iki wong sing sampurna kaweruhé.

⁵Ngertia, Gusti Allah kuwi Mahakuwat, nanging ora ana barang sing dirèmèhké, kekuwatan-Né kuwi ing bab kekuwatané kepinteran.

⁶Wong ala ora pada dilestarèkké urip, nanging wong sing sangsara pada dikèki keadilan.

⁷Panjenengané ora ménga-ménguh enggoné nyawang marang wong bener, nanging kuwi sak lawas-lawasé pada dikèki panggonan sandingé para ratu ing dampar, terus pada gedé kaluhurané.

⁸Yèn pada dibanda karo ranté ketalèn karo kasangsaran,

⁹Gusti Allah terus ngélingké marang penggawéné lan paneraké, ya kuwi enggoné gemunggung.

¹⁰Terus kupingé dibukak supaya bisa nampani piwulang, lan ngongkon supaya pada ninggal sing ala.

¹¹Yèn pada ngrungokké karo sujut, uripé bakal ngalami kabekjan selawasé, lan urip pénak nganti tekan pungkasané tauné.

¹²Senajan mengkono yèn pada ora ngrungokké mesti bakal pada mati kena tumbak lan entèk ing sak njeruhné kabodoané.

¹³Para wong sing atiné ala kuwi pada nyimpen bebendu; lan ora gelem sambat yèn dibanda karo Panjenengané;

¹⁴nyawané entèk sak njeruhné ijik nom, uripé tyuntel durung wantyiné.

¹⁵Wong sangsara diluwari karo sangsara, kupingé dibukak karo penindes.

¹⁶Kowé uga dibujuk bisané metu sangka kangèlan menyang panggonan sing jembar sing sepi ing penindes, marang méja sing kahanané tentrem lan sing kebak pangan karo gajih.

¹⁷Nanging kowé wis sak mestiné nampa kabèh ukumané wong duraka, kowé dityengkerem karo ukuman lan keadilan;

¹⁸panasé ati aja nganti mbujuk kowé supaya nyepèlèkké, lan gedéné tebusan aja nganti nasarké kowé.

¹⁹Apa kasugihanmu bisa nylametaké kowé sangka kangèlan, utawa kabèh kekuwatan enggonmu rekasa?

²⁰Aja kangen marang mbengi wantyiné para bangsa pada lunga sangka panggonané.

²¹Kowé sing ngati-ati aja nganti madep marang sing ala awit ya kuwi sing njalari kowé dijajal karo sangsara.

²²Sejatiné Gusti Allah kuwi luhur pangwasané, endi ana guru sing madani Panjenengané?

²³Sapa sing netepaké dalané, lan sapa sing wani ngomong: Panjenengan wis nandangi ora adil?

²⁴Elinga yèn kowé kudu ngluhurké penggawéané, sing tansah dikidungké karo manungsa.

²⁵Kabèh wong pada weruh, enggoné mandeng sangka kadohan.

²⁶Tenan Gusti Allah kuwi gedé, ora kena digayuh karo kaweruh kita, tyatyahé tauné ora bisa dimengerti.

²⁷Tètès-tètèsé banyu digèrèt munggah, lan mantyur dadi udan tyampur pedut,

²⁸disokké karo mendung ing awang-awang disiramké marang wong okèh.

²⁹Apa ana wong sing ngerti dadiné mendung lan swara ombaké ing omahé?

³⁰Lah Piyambaké nggelarké pepadangé ing sak ubengé lan ngemuli dasaré segara.

³¹Awit kuwi enggoné ngadili para bangsa lan enggoné ngekèki pangan nganti lubèr.

³²Tangané loro-loroné kebuntel karo klélap sing dikongkon nyamber sing kudu diserang.

³³Suraké perang ngabarké tekané ya kuwi yèn banget-banget enggoné merangi sing duraka karo bebendu.”