Read Caribbean Javanese Ayub 37 Bible Online

Ayub 37 - Caribbean Javanese bible

Ayub 37

¹“Nyata kuwi ndadèkké gemeteré atiku nganti njingkat sangka panggonané.

²Rungokna, rungokna gembluduké swarané, gluduk sing metu sangka tutuké.

³Sing diutyuli ing sak uruté jembaré langit lan uga klélapé menyang pojok-pojokané bumi.

⁴Sakwisé mengkono Panjenengané ditutké karo swara gemrubuk, gembluduk swarané kaluhurané. Yèn swara kuwi dirungokké Panjenengané ora ngéman bledèké.

⁵Gusti Allah ngetokké swara gemleger sing ngidap-idapi. Panjenengané nindakké penggawéané gedé sing ora kena digayuh karo kaweruh kita,

⁶awit salju diomongi: Tibaa ing bumi! Lan marang udan deres lan udan sing gembrojok préntahé: Deresa!

⁷Saben wong tangané ketalènan lan dikèki ségel, supaya kabèh wong weruh penggawéané.

⁸Kéwan alasan pada mlebu ing panggonan pandelikané lan mapan ing guwa-guwané.

⁹Lésus njedul sangka gedongé, lan hawa adem sangka lor.

¹⁰Napasé Gusti Allah njalari kedadiané ès, lan nduwuré banyu dadi kentel.

¹¹Mendung dimomoti banyu, lan mendung nylorotké klélapé,

¹²klélapé terus nyamber-nyamber menyang ngendi-endi miturut karo préntahé, ing bumi nindakké kabèh sing dipréntahké;

¹³Gusti Allah nggawé supaya bisa nggayuh tujuané kanggo ngukum isiné buminé apa kanggo njembarké katrésnan-Né.

¹⁴Kuwi kabèh rungokna, hé! Ayub, menenga lan gatèkna marang mujijat-mujijat Gusti Allah.

¹⁵Apa kowé weruh kepriyé enggoné Gusti Allah ngekèki tugas marang kuwi kabèh lan enggoné nylorotké padangé sangka mendung?

¹⁶Apa kowé ngerti bab mlakuné mendung, lan bab mujijat-mujijat sing maha weruh,

¹⁷kowé, sing krasa marang angeté sandangan, yèn bumi meneng awit kena panasé angin sangka kidul.

¹⁸Apa kowé bisa nata mendung dadi sak dawané langit kaya Panjenengané, nganti padet kaya pangilon tyitakan?

¹⁹Kita diomongi, kepriyé kita kudu pada ngomong apa marang Panjenengané, awit kita ora bisa ngomong apa-apa, jalaran kepetengan.

²⁰Apa ana sing bakal ngekèki ngerti, yèn aku arep nduwé tembung? Apa wong tau omong, yèn kepéngin dientèkké.

²¹Saiki pepadang ora kétok, awit kepetengan karo mendung, nanging mengko kena karo angin, terus resik padang.

²²Sangka sisih lor ana pepadang sing kaya emas, Gusti Allah dikwasani karo kamulyan sing medèni.

²³Sing Mahakwasa, sing pada ora tak mengertèni, kuwi gedé pangwasané lan keadilané; senajan sugih kabeneran, senajan mengkono ora nindes,

²⁴mulané diwedèni karo wong, lan saben wong sing rumangsa wityaksana, kuwi ora diperduli.”