Read Caribbean Javanese Ayub 38 Bible Online

Ayub 38 - Caribbean Javanese bible

Ayub 38

¹GUSTI terus nyauri marang Ayub sangka sak njeruhné lésus, tembungé:

²“Sapa ta sing nggawé petengé putusan karo tembung sing tanpa pamikir?

³Maraa kaya wong lanang! Kowé Tak tyeluk, Aku omongana.

⁴Kowé ana ngendi, waktu Aku nelesi bumi. Ngomonga yèn kowé ngerti!

⁵Sapa sing netepaké ukurané kowé apa ora weruh? Lan sapa sing mentèng tali ukurané?

⁶Tyagak-tyagaké mantyep ing ngendi lan sapa sing masang watu pojokan,

⁷ing waktu lintang-lintang ésuk pada seneng-seneng bebarengan lan para anaké Gusti Allah pada surak-surak?

⁸Sapa sing mbendung segara karo lawang waktu ijik kemrasak metu sangka wetengé,

⁹waktu Aku nggawé mendung kanggo sandangané lan pepeteng kanggo buntelé;

¹⁰waktu Aku netepaké watesé, lan masang slorok kantyingé lan lawang;

¹¹waktu Aku ngomong: Tekan ing kéné waé, aja kliwat, ing kéné ombakmu sing gemunggung bakal pada diendek!

¹²Ing sak njeruhné uripmu apa kowé tau ngundang marang tekané ésuk lan mernahké ésuk wétan,

¹³supaya pada nyekel pojokané bumi lan ngebutké wong duraka?

¹⁴Bumi mau terus salin rupa dadi lempung sing dityap, samubarang kabèh rupa kaya klambiné.

¹⁵Para wong duraka pada kélangan pepadangé, tangan sing diatyungké ditugel.

¹⁶Apa kowé wis bisa mudun nganti tekan sumberé segara lan wis ndlajahi dasaré segara?

¹⁷Apa gapurané pati wis pada kétok marang kowé lan apa kowé wis weruh lawangé teleng palimengan?

¹⁸Apa kowé ngerti jembaré bumi? Tyeritakna, yèn kowé wis weruh kuwi kabèh!

¹⁹Ing ngendi dalan sing tekan panggonané pepadang, lan ing ngendi pernahé pepeteng,

²⁰supaya kowé terus bisa mernahké ing pangwasané déwé-déwé lan weruh dalan-dalan sing tekan panggonané?

²¹Mesti kowé wis weruh, awit waktu semono kowé wis lair, lan wis okèh tyatyahé dinamu!

²²Apa kowé wis mlebu ing gedong simpenané salju, lan apa wis weruh simpenané udan krikil,

²³sing Aku nyimpen kanggo dina kangèlan, kanggo waktu gelut lan perang?

²⁴Ing ngendi dalané menyang panggonan sumberé pepadang, lan panggonan pentyaré angin ing sak lumahé bumi?

²⁵Sapa sing nggawé ilèn-ilèné udan deres lan dalan kanggo klélapé gluduk,

²⁶supaya tanah sing ora dienggoni karo wong lan ara-ara sing suwung pada kudanan;

²⁷lan supaya ara-ara samun lan tanah sing ludes pada kewareken uga suket-suket pada tukul seger?

²⁸Apa udan kuwi ana bapaké? Lan sapa sing nganakké nètèsé ebun?

²⁹Es kuwi metu sangka wetengé sapa, lan ebun sing kentel ing langit kuwi sapa sing nglairké?

³⁰Banyu kentel nganti kaya watu, lan nduwuré segara dadi atos.

³¹Apa kowé bisa mbundeli taliné lintang Wuluh, lan ngutyuli bandané lintang Wluku?

³²Apa kowé bisa ngetokké lintang Bima sutyi ing waktuné, lan nuntun mlakuné lintang Kapal lan anak-anaké?

³³Apa kowé weruh pernatané langit lan netepké enggoné mréntah ing bumi?

³⁴Apa kowé bisa mbengokké swaramu nganti tekan mendung, nganti kowé terus kebanjiran?

³⁵Apa kowé bisa ngetyulké klélap, nganti pada samber-samberan karo ngomong marang kowé: kita nang kéné?

³⁶Sapa sing ngekèki weruh manuk ibis yèn kali Nil bakal banjir, utawa sapa sing ngekèki ngerti marang jago yèn udan arep teka?

³⁷Sapa bisa ngitung mendung karo kawityaksanan, lan sapa sing bisa nyuntak gentongé langit,

³⁸waktu lebu kentel dadi logam lan prongkolan lemah pada kelèt dadi siji?