Read Caribbean Javanese Ayub 39 Bible Online

Ayub 39 - Caribbean Javanese bible

Ayub 39

¹Apa kowé bisa nggolèkké memangsané singa wédok, lan bisa maremké marang singa nom,

²yèn pada mendek-mendek ing guwané yèn pada ndingkik ing grumbulan?

³Sapa sing nyawiské pangané gagak, yèn anaké pada sambat marang Gusti Allah, pada mbengok-mbengok awit ora ana pangan?

⁴Kowé apa weruh wantyiné wedus gunung nduwé anak, utawa apa namatké menjangan wédok enggoné mbayi?

⁵Apa kowé bisa ngitung pirang sasi enggoné meteng lan apa bisa weruh ing waktuné manak?

⁶Enggoné nglairké anaké, karo njengking lan terus ngetokké isiné wetengé.

⁷Anaké pada dadi rosa lan gedé ing ara-ara, pada lunga lan ora bali marang emaké.

⁸Sapa sing ngumbar kimar alasan, utawa sapa sing ngutyuli dadungé kimar ing ara-ara?

⁹Ara-ara sing Tak wènèhké dadi panggonané lan tanah asin dadi panggonané.

¹⁰Raméné kuta dipoyoki, ora krungu swarané sing nggiring;

¹¹terus golèk pangonan ing gunung-gunung, lan nggolèki samubarang sing ijuh.

¹²Apa sapi alasan gelem teluk marang kowé utawa gelem turu ing sak tyedaké ambènmu yèn mbengi?

¹³Apa kowé bisa meksa sapi alasan manut pasangané ngluku karo keluhan, utawa nggaru bumi ing legokan ngetutké mlakumu?

¹⁴Apa kowé pertyaya, awit gedé kekuwatané? Utawa terus kowé dipasrahi penggawéanmu sing abot?

¹⁵Apa kowé netepaké, yèn bakal nguléhké pametuné lemahmu, lan nglumpukké ing panggonan pametuné gandummu?

¹⁶Manuk unta ngeblak-ngeblak karo bungah nanging apa sewiwi lan wuluné kuwi ndadèkké manuk ooievaar?

¹⁷Awit endoké ditinggal nang lemah, lan ditokké lan dienggremi ing wedi,

¹⁸nanging lali, yèn endok mau bisa kepidak sikil, lan diiles-iles karo kéwan alasan.

¹⁹Ngrumati marang anak-anaké abot kaya duduk anaké déwé; senajan rekasané tanpa guna, ora perduli,

²⁰awit ora dikèki kawityaksanan karo Gusti Allah lan ora dipandumi pangertèn.

²¹Yèn ngeblak-ngeblak karo gemunggung, terus nggeguyu jaran lan sing numpaki.

²²Apa kowé sing ngekèki karosan marang jaran? Apa kowé sing nyandangi jenggèr ing gitoké?

²³Apa kowé sing nggawé bisa mlumpat kaya walang? Yèn nggeber medèni tenan.

²⁴Enggoné takur-takur ing lemah karo seneng, enggoné maju metuk gaman karo kekuwatan.

²⁵Sembarang sing medèni diguyu lan ora tau wedi uga ora gelem mundur yèn adep-adepan karo pedang.

²⁶Wadah panah kemrintying ing sak nduwuré, tumbak lan tuwok pating tylèrèt.

²⁷Karo kendel lan galak lemah dikemah-kemah, lan banget notolé yèn krungu uniné trompèt;

²⁸ngerik-ngerik yèn trompèt diunèkké; lan sangka kadohan wis bisa ngambus anané perang, banteré swarané para penggedéné lan suraké suradadu.

²⁹Apa kepinteranmu sing mulangi maburé manuk alap-alap karo megarké swiwiné nuju ngidul?

³⁰Apa awit sangka préntahmu manuk beri kuwi enggoné terus mumbul lan nusuh ing panggonan sing duwur?

³¹Enggoné manggon lan nusuh ing gunung watu, ing putyuké gunung watu lan ing gunung sing angèl diunggahi.

³²Ing kono enggoné ingak-inguk memangsané, matané ngawas-awasi sangka kadohan;

³³anaké pada nyosropi getih lan ing ngendi ana batang, manuk beri mesti ing kono.”

³⁴GUSTI terus nyauri, tembungé marang Ayub:

³⁵“Tukang ndakwa apa ijik arep nggawé perkara marang sing Mahakwasa? sing nyalahké Gusti Allah kuwi supaya nyauri!”

³⁶Ing kono semauré Ayub marang GUSTI:

³⁷“Tenan, kula kuwi asor banget, kula bakal nyauri apa marang Panjenengan? Tutuk kula kula tutupi karo tangan.

³⁸Sepisan kula wis nduwé tembung, nanging bakal ora kula takokké menèh; malah kaping pindo, nanging ora bakal kula terusaké.”