Read Caribbean Javanese Ayub 4 Bible Online

Ayub 4 - Caribbean Javanese bible

Ayub 4

¹Ing kono Elifas wong Téman nyauri, tembungé:

²“Yèn ana wong njajal guneman karo kowé, apa ndadèkké gelané atimu? Nanging sapa sing bisa ngempet tembungé?

³Lan wis okèh wong sing pada kok wulangi, tangan sing lemes wis kok kuwatké,

⁴wong sing tiba wis kok tangèkké karo tembungmu, dengkul sing gloyoran wis kok kuwatké,

⁵nanging bareng kowé déwé wiwit kedemok, kowé terus ngenes, bareng katekan kangèlan, atimu semplak.

⁶Apa ora pangabektimu marang Gusti Allah sing dadi pengandelmu, lan katemenané mlakumu sing dadi pengarep-arepmu?

⁷Rasakna ta: Ngendi ana wong resik sing nemu karusakan, utawa wong temen sing ditumpes?

⁸Sak weruhku wong sing mluku tyilaka lan nyebar kangèlan, ya kuwi uga sing diunduh.

⁹Pada entèk karo napasé Gusti Allah, lebur karo banteré nesuné.

¹⁰Singané nggeruh, singané nggereng, untuné singa nom pada rompal.

¹¹Singa tuwa mati awit kekurangan mangsa, lan anaké singa wédok pada buyar.

¹²Aku wis dibisiki pitutur, tembung sing dibisikké ya wis ditampa karo kupingku,

¹³sak njeruhné ngrasak-ngrasakké impèn-impèn ing wayah mbengi, ing waktuné wong ngalami turu kepati,

¹⁴aku katekan wedi lan ndredek, sing njalari balung-balungku gemeter.

¹⁵Terus ana rohé liwat ing ngarepku, nganti wuluné awakku mengkorok kabèh.

¹⁶Waktu mandek ing ngarepku, aku ora bisa nitèni rupané. Ana sing kétok ing pandelengku, aku terus krungu swara mbisiki mengkéné:

¹⁷Apa manungsa bisa bener ing ngarepé Gusti Allah, apa manungsa bisa tanpa salah ing ngarepé Sing nggawé?

¹⁸Sak tenané Gusti Allah ora pertyaya marang para abdiné, lan para mulékaté ya ditemokké enggoné kesasar,

¹⁹apa menèh para sing manggon ing omah lempung, sing dibangun sangka lebu, sing pada diidak-idak nganti mati kaya rayap.

²⁰Wiwit ésuk nganti soré pada diidek-idek, lan tanpa krasa pada entèk selawasé.

²¹Apa taliné tarupé ora dipedot? Pada mati nanging tanpa kawityaksanan.