Read Caribbean Javanese Ayub 40 Bible Online

Ayub 40 - Caribbean Javanese bible

Ayub 40

¹GUSTI terus ngomong menèh marang Ayub sangka sak tengahé lésus, mengkéné:

²“Maraa dadia kaya wong lanang; Kowé bakal Tak tyeluk, Aku disauri.

³Apa kowé arep ngilangi pengadilan-Ku nyalahké Aku supaya bisa mbenerké awakmu déwé?

⁴Apa tanganmu kaya tangané Gusti Allah, lan apa kowé bisa ngetokké swara gembluduk kaya Panjenengané?

⁵Yèn mengkono awakmu wènèhana rerékan kamulyan lan kaluhuran, kowé nganggoa kahurmatan lan wibawa!

⁶Esokna nesumu sing mulat-mulat; awasana saben wong sing gemunggung lan asorna,

⁷awasana saben wong sing sombong-sombong kuwi lan dingklukna. Lan wong duraka pada kok lebur ing panggonané!

⁸Pendemen bebarengan ing njeruhné lebu, ukumen ing panggonan sing ndelik,

⁹nganti Aku bakal ngelem-elem marang kowé, awit tanganmu tengen ngekèki kemenangan marang kowé.”

¹⁰“Kowé nyawanga jaran Nil[5], sing wis Tak gawé uga kaya kowé. Kuwi mangan suket kaya sapi.

¹¹Kowé nyawanga kekuwatané sing manggon ing lempèngé kekuwatané ing ototé wetengé!

¹²Enggoné ngentyengké buntuté kaya wit tyemara, otot-ototé pupuné talèn-talènan,

¹³Balung-balungé kaya pipa tembaga, ragangané kaya balok wesi.

¹⁴Kuwi sing ndisik déwé digawé karo Gusti Allah, makluk sing dikèki gaman pedang;

¹⁵gunung-gunung pada ngetokké sing kanggo pakané; kéwan alasan pada seneng-seneng ing kono.

¹⁶Jaran Nil mau enggoné njerum ing sak ngisoré wit traté, kaling-kalingan karo glagah lan rawa.

¹⁷Tetukulan traté pada ngayomi karo ayang-ayangé, lan diubengi karo wit truntum.

¹⁸Senajan iliné banyu banter banget, kéwan mau ora gemeter; senajan laut Yordan lubèr nyerang marang tyangkemé, atiné ya énak-énak waé.

¹⁹Apa wong bisa nyekel sangka ngarep lan bisa ngeluhi irungé?”

²⁰“Apa kowé bisa nggèrèt bajul nganggo pantying, utawa njiret ilaté nganggo tali?

²¹Apa kowé bisa masang tali penjalin ing irungé, utawa nyubleské gantolan ing rahangé.

²²Apa kira-kira kéwan mau bisa njaluk kawelasan marang kowé, utawa bisa ngomong alus marang kowé?

²³Apa kira-kira bisa nggawé perjanjian karo kowé, nganti terus kowé ndadèkké batur ing selawasé?

²⁴Apa kowé bisa dolanan karo kéwan mau kaya karo manuk, lan apa bisa kok dadèkké dolanané anak-anakmu wadon?

²⁵Apa kira-kira kena didadèkké dagangané para tukang nggolèk iwak, utawa diedum-edum ing antarané para wong dagang?

²⁶Apa kulité kena kok jojohi karo tumbak, utawa endasé karo tlempak?

²⁷Tanganmu kok tumpangna ing endasé! Elinga marang enggoné tarung! Kowé ora bakal nindakké mengkono menèh!

²⁸Pengarep-arepmu kuwi tenan tanpa isi. Ijik weruh kéwan kuwi waé, wong wis ambruk.