Read Caribbean Javanese Ayub 41 Bible Online

Ayub 41 - Caribbean Javanese bible

Ayub 41

¹Senajana anaa wong sing sembranané nganti wani nangèkké nesuné bajul kuwi, lan sapa sing kuwat maju nglawan marang Aku?

²Sapa sing ngadepi Aku, sing Tak gawé tetep slamet? Samubarang sing ana sak ngisoré langit kuwi wis dadi duwèk-Ku kabèh.

³Aku ora bakal meneng waé kanggo balung-balungé bajul kuwi, bab kekuwatané lan apiké pawakané.

⁴Sapa sing bisa mbukak jubahé? Sapa sing bisa nyuduk nganti tembus sisiké sing rangkep kuwi?

⁵Sapa sing bisa mbukakké nutupé tyangkemé? Ing sak ubengé untuné kahanané medèni.

⁶Gegeré rupa tamèng-tamèng sing kuwat, sing kelèt rapet kaya ségel.

⁷Siji lan sijiné gandèng rapet nganti ora bisa klebon angin;

⁸sing siji kelèt karo sijiné tyatok-tyatokan ora kena pisah.

⁹Yèn wahing metu sloroté, matané kaya njedulé ésuk wétan.

¹⁰Tyangkemé metu ontyoré, lan nyemburké geni sing pating pletik.

¹¹Irungé metu kemebulé kaya sangka kwali sing umup isiné kemebul.

¹²Ambekané ngobong areng, tyangkemé metu geniné.

¹³Gitoké kanggonan kekuwatan, rasa wedi jingklak-jingklak ing ngarepé.

¹⁴Gèmbèl-gèmbèlé dagingé pada kelèt, kelèt ing awaké ora glémbyar-glémbyor.

¹⁵Atiné atos kaya watu, atosé kaya watu landesané gilingan.

¹⁶Yèn ngadek, kabèh wong sing kwasa pada gemeter dadi bingung jalaran wedi.

¹⁷Yèn dipedang ora masah, mengkono uga ditumbak, ditowok utawa dipanah.

¹⁸Wesi dirasa kaya damèn, tembaga kaya kayu gapuk.

¹⁹Panah ora bisa nglungakké, bandem watu kaya malih dadi damèn.

²⁰Gepuk dianggep merang lan swarané tumbak diguyu.

²¹Ing ngisoré ana sing kaya beling lintyip-lintyip, yèn mengkurep ing endutan kaya piranti kanggo ngluku.

²²Panggonané didadèkké molak-malik kaya godongan ing kendil, segara didadèkké piranti ngolah tyampuran bumbon.

²³Tilas mlakuné semlorot, terus segara kok kira uwané wong.

²⁴Ing sak lumahé bumi ora ana sing madani, kuwi makluk sing ora kanggonan wedi.

²⁵Kabèh sing luhur pada wedi karo kéwan kuwi, kuwi dadi ratuné kabèh kéwan galak.”