Read Caribbean Javanese Ayub 42 Bible Online

Ayub 42 - Caribbean Javanese bible

Ayub 42

¹Ing kono Ayub terus nyauri marang GUSTI, tembungé:

²“Kula saiki ngerti, yèn Panjenengan kwasa nindakké samubarang, lan ora ana karep Panjenengan sing bisa ngendek.

³Panjenengan takon mengkéné: Sapa sing nutupi putusan tanpa kaweruh? Wis tyeta yèn enggèn kula tyerita kuwi tanpa pangertèn. Sing ora digayuh karo pikiran kula kuwi kula tyritakké.

⁴Panjenengan préntah: Rungokna, Aku bakal ngekèki tembung; Kowé arep Tak tyeluk, kowé nyauri!

⁵Enggèn kula krungu bab Panjenengan kuwi mung sangka omongé wong, nanging saiki kula weruh Panjenengan karo mripat kula déwé.

⁶Mulané tembung-tembung kula kula tyabut, lan karo nelangsa kula sendeku ing lebu lan awu.”

⁷Sakwisé GUSTI mungkasi tembungé ing nduwur mau marang Ayub, terus ngomong marang Elifas, wong Téman, mengkéné: “Nesu-Ku mulat-mulat marang kowé lan marang kantyamu loro-loroné, awit keteranganmu kanggo Aku ora bener kaya abdi-Ku Ayub.

⁸Mulané saiki kowé pada njupuka sapi lanang nom pitu lan wedus gèmbèl lanang ya pitu, terus maranana abdi-Ku Ayub, pada nganakna kurban obongan, lan Ayub abdi-Ku njalukké pandonga kanggo kowé, awit mung pandongané sing bakal Tak tampa, supaya kowé ora pada Tak pilara, awit keteranganmu kanggo Aku ora bener kaya abdi-Ku Ayub.”

⁹Elifas wong Téman, Bildad wong Suah, lan Sofar wong Naama terus pada nindakké kaya préntahé GUSTI mau lan GUSTI gelem ngrungokké pandongané Ayub.

¹⁰GUSTI terus ngluwari Ayub sangka sangsarané, sakwisé ndongakké kantyané mau lan dikèki tikelé sing wis dadi duwèké mbiyèn.

¹¹Waktu kuwi Ayub kedayohan karo sak kabèhé seduluré lanang wadon uga kenalané kabèh, pada mangan bebarengan mangan karo Ayub ing omahé karo ngomongké béla sungkawa lan ngekèki panglipuran ing bab enggoné mentas dikèki kasangsarané karo GUSTI, uga siji-sijiné pada ngekèki duwit sak kesitah karo ali-ali emas siji.

¹²Ayub diberkahi karo GUSTI nganti ngungkuli dèk mbiyèn; duwèké sing rupa wedus lan wedus gèmbèl 14.000, untané 6000, sapiné 1000 rakit lan sing rupa kimar wédok 1000.

¹³Anaké sing lanang pitu lan sing wadon telu.

¹⁴Anaké wadon mau sing mbarep dijenengaké Yemima, sing kaping pindo Kesia lan sing kaping telu Keren-Hapuk.

¹⁵Ing sak negara ora ana wong wadon sing ayuné kaya anak-anaké Ayub, kabèh pada dipandumi warisan karo bapaké pada kaya seduluré lanang.

¹⁶Sakwisé kelakon sing disebut ing nduwur iki, Ayub dikèki umur menèh 140 taun lan menangi anak-putuné nganti patang turunan.

¹⁷Patiné Ayub wis tuwa banget, wis warek enggoné ngrasakaké uripé.