Read Caribbean Javanese Ayub 6 Bible Online

Ayub 6 - Caribbean Javanese bible

Ayub 6

¹Ing kono Ayub terus nyauri:

²“Aduh supaya kangèlanku ditimbang karo titis, lan kasangsaranku disèlèhké ing timbangan!

³Aboté mesti ngungkuli wedi ing segara; mulané metuné omongku grusah-grusuh.

⁴Awit jemparingé sing Mahakwasa pada mantyep ing awakku, ratyuné nesep ing nyawaku; aku krasa sing medèni sangka Gusti Allah.

⁵Kimar alasan apa ya nggereng-nggereng ing suketan ijuh, sapi apa ya mbengak-mbengok ing ngarepé pakané?

⁶Barang sing tyemplang rasané apa dipangan tanpa uyah, utawa putihé endok apa ana rasané?

⁷Ndemok waé aku ora sudi, kanggo aku kuwi pangan sing ngunek-uneki.

⁸Ah, supaya penjalukku keturutan, Gusti Allah supaya gelem ngekèki sing dadi pengarep-arepku!

⁹Gusti Allah supaya gelem ngremuk aku, ngagakké tangané lan ngendek uripku!

¹⁰Kuwi sing ijik dadi panglipuran kanggo aku, malah aku bakal jingklak-jingklak awit sangka bungahku. Ing sak njeruhné aku ngalami sangsara sing tanpa kawelasan kuwi, awit aku ora tau nyedekki tembungé sing Mahasutyi.

¹¹Sak pira ta kekuwatané, kok aku bisa tahan, lan apa ta pungkasané awakku, kok aku ijik kudu sabar?

¹²Apa kekuwatané kuwi kaya watu? Apa dagingku kaya prunggu?

¹³Apa wis ora ana pitulungan babar pisan kanggo aku, lan keslametan wis adoh sangka aku?

¹⁴Wong sing ora welas marang sak pepadané, kuwi nglalèkké ngabekti marang sing Mahakwasa.

¹⁵Sedulurku pada ora kena dipertyaya kaya kali, kaya banyu sing metu sangka dasaré kali,

¹⁶sing butek awit banyuné kentel, salju ing njeruhné dadi èntyèr,

¹⁷ing waktu panas pada mudun, yèn kena ing kekuwatané panas terus asat ing panggonané;

¹⁸iliné ménggak-ménggok, tekan ing ara-ara samun terus mati.

¹⁹Pedagang sangka Tema pada ngingak-nginguk, para pedagang ing Syéba pada ngarep-arep,

²⁰nanging pada ketyelik awit sangka pengarep-arepé, sak tekané ing kana bakal kapusan.

²¹Ya kaya mengkono kuwi kowé kabèh saiki kanggo aku, waktu kowé pada weruh kahanan sing medèni, terus pada kagèt.

²²Apa aku tau omong: Nggawaa olèh-olèh, lan: Aku wènèhana duwit beselan sangka bandamu,

²³utawa: Aku slametna sangka tangané sing nglarani, lan: Aku tebusen sangka tangané wong sing nindes?

²⁴Aku wulangna, nganti aku bakal meneng; aku ngerti sing dadi kesalahanku.

²⁵Kepriyé gedéné kwasané pitutur sing jujur! Nanging apa tegesé pamelèhmu kuwi?

²⁶Apa karepmu kuwi nyalahké tembung? Apa tembungé wong sing entèk pengarep-arepé kuwi dianggep angin?

²⁷Malah kowé pada mbuwang lotré kanggo botyah lola, nanging kantyamu kok dadèkké barang dagangan.

²⁸Nanging saiki aku sawangen; aku apa ora bakal ngapusi kowé.

²⁹Pada mbalika ta, aja nganti ana sing ora jujur sing ditandangi; ya pada mbalika, aku iki tenan-tenan bener.

³⁰Ing ilatku apa ana durakané? Tyetaku apa ora bisa mbédak-mbédakké kasangsarané?”