Read Caribbean Javanese Ayub 8 Bible Online

Ayub 8 - Caribbean Javanese bible

Ayub 8

¹Terus Bildad wong Suah nyauri, tembungé:

²“Nganti pira suwéné enggonmu nduwé tembung mengkono kuwi, lan tembungé tutukmu kaya angin gedé kuwi?

³Apa ya Gusti Allah mbéngkongké keadilan? Apa ya sing Mahakwasa mbéngkongké sing bener?

⁴Yèn anak-anakmu pada nggawé dosa marang Panjenengané, mesti wis dipasrahké marang pangwasané paneraké déwé.

⁵Nanging yèn enggonmu nggolèki Gusti Allah, lan njaluk kawelasan marang sing Mahakwasa,

⁶angger kowé resik lan temen, Panjenengané mesti terus tangi lan mitulungi kowé, lan ndandani omah sing dadi wewenangmu.

⁷Terus kahananmu sing mbiyèn bakal kétok asor, nanging kahananmu sing bakal klakon bakal dadi mulya banget.

⁸Takona ta bab wong-wong jaman mbiyèn, lan gatèkna apa sing wis dititipriksa karo para leluhuré.

⁹Awit kita iki botyah dèk wingi soré, pada ora weruh apa-apa, awit umur kita ing ndonya iki kaya ayang-ayang.

¹⁰Para leluhur kita apa ora kudu mulangi lan ngomong marang kowé, lan ngetokké tetembungan sing metu sangka atiné.

¹¹Bangsané suket glagah apa bisa tukul duwur, yèn ora ing rawa, utawa glagah apa bisa tukul subur yèn tanpa banyu?

¹²Senajan ijik arepé tukul, sak durungé waktuné wis dibatyok, apa ora mesti terus gelis alum, tenimbang karo suket liyané.

¹³Ora béda karo lelakoné sak kabèhé wong sing ora éling marang Gusti Allah; kuwi entèk pengarep-arepé;

¹⁴pengarep-arepé kaya jaring kemlandingan, lan pengandelé kaya jaring kalamangga,

¹⁵omahé dienggo sèndènan, nanging ora bisa terus ngadek, digondèli, nanging ora kuwat.

¹⁶Dèwèké kaya tetukulan sing ijik seger ing padangé srengéngé, ngglolor rata ing petamanan.

¹⁷Oyot-oyoté nggubet-nggubet ing tumpukan watu, lan nlesep-nlesep ing sela-selané watu-watu kuwi.

¹⁸Yèn dijebol sangka panggonané, terus ora diakoni karo panggonan mau, semauré: Aku durung tau weruh kowé.

¹⁹Ya mengkono kuwi kabungahané uripé, lan terus ana tetukulan liyané sing tukul sangka lemah.

²⁰Ngertia, Gusti Allah ora bakal nampik wong sing temen, lan ora nuntun tangané wong sing nggawé ala.

²¹Panjenengané ijik nggawé tutukmu ngguyu, lan nggawé lambému surak-surak.

²²Mungsuhmu bakal ngalami kisinan, lan tarupé wong ala bakal entèk.”