Read Caribbean Javanese Masmur 10 Bible Online

Masmur 10 - Caribbean Javanese bible

Masmur 10

¹Duh GUSTI, kenèng apa Panjenengan ngadek ing kadohan, lan ndelik ing waktu kangèlan?

²Awit gemunggungé wong duraka tenan-tenan anggèné nguber para wong sing ditindes. Supaya wong duraka kuwi kejiret karo kekarepané ala sing dirantyam.

³Awit wong duraka kuwi ngegul-ngegulké kepénginan atiné, lan wong murka kuwi ngutyapké bendu lan ngèlèk-èlèkké GUSTI.

⁴Wong duraka omongan karo nyengirké irungé: “Gusti Allah apa ora bakal nuntut!” kabèh gagasané muni: “Ora ana Gusti Allah.”

⁵Sak mlaku-mlakuné tansah olèh-gawé, pengadilan Panjenengan keduwuren kanggo dèwèké; kabèh sing nglawan dirèmèhké.

⁶Atiné ngomong mengkéné: “Aku ora bakal gogrok, aku ora bakal kena tyilaka nganti turun-temurun.”

⁷Tutuké kebak sepata-sepata lan goroh lan nindes, ilaté isi ala lan nyiksa.

⁸Wong iki ngindik-indik ing gubuk-gubuk, ing pandelikan matèni wong sing ora kesalahan, mripaté ngindik wong sing apes.

⁹Ing pandelikan molèt-molèt, kaya singa ing grumbulan; ngindik-indik arep nubruk wong sing kasusahan, digèrèt karo jaringé.

¹⁰Bungkuk, ndekem, para wong ringkih terus pada tiba ing tyengkeremané kukuné sing kuwat.

¹¹Wong iki ngomong ing njeruhné atiné: “Gusti Allah lali, praupan-Né ditutupi, mesti bakal ora weruh ing sak terusé.”

¹²Duh GUSTI, Panjenengan supaya gelem ngadek. Duh Gusti Allah supaya gelem ngelungké tangan Panjenengan, aja nganti lali marang wong sing kasusahan.

¹³Kenèng apa wong duraka ora ngajèni Gusti Allah, karo ngomong ing njeruhné atiné: “Gusti Allah ora nuntut.”

¹⁴Panjenengan pantyèn ngerti, awit Panjenengan weruh kasusahan lan larané ati, Panjenengan njukuk ing tangan Panjenengan piyambak, wong apes njagakké Panjenengan, Panjenengan kuwi sing mitulungi botyah lola.

¹⁵Tangané wong duraka lan wong ala supaya Panjenengan tugel, dosané supaya Panjenengan tuntut, nganti Panjenengan ora nemokké menèh.

¹⁶GUSTI dadi Ratu sak terusé lan selawasé. Bangsa-bangsa pada entèk sangka tanah duwèké.

¹⁷Duh GUSTI, kepénginané para wong sing ditindes wis Panjenengan rungokké. Atiné Panjenengan kuwatké, kuping Panjenengan ngrungokké,

¹⁸perlu ngekèki kabeneran marang botyah lola lan wong sing ditindes, supaya aja nganti ana manungsa ing bumi menèh sing nggawé wedi.