Read Caribbean Javanese Masmur 102 Bible Online

Masmur 102 - Caribbean Javanese bible

Masmur 102

¹Pandongané wong sangsara waktu semplak lan terus ngesokké sambaté nang ngarepé GUSTI.

²Duh GUSTI, Panjenengan supaya gelem ngrungokké pandonga kula, enggèn kula sambat njaluk pitulungan supaya bisaa teka ing ngarepé Panjenengan.

³Supaya aja ndelikké praupan Panjenengan kanggo kula ing dina kangèlan kula. Supaya gelem mbukakké kuping Panjenengan marang kula; yèn kula sambat supaya gelis disauri!

⁴Awit dina-dina kula entèk kaya kebul, balung kula pada murup kaya geni.

⁵Ati kula kegepuk lan alum kaya suket, nganti terus lali mangan roti kula.

⁶Awit sangka sambat kula sing banter kula nganti kari belung karo kulit.

⁷Kula wis kaya manuk blekok ing ara-ara samun, lan manuk beluk ing jugrukan.

⁸Kula ora bisa turu lan wis dadi kaya manuk kepentyil ing payon.

⁹Sedina muput kula dièlèk-èlèk karo para satru kula, wong sing pada nggawé dolanan kula sumpah karo nyebut jeneng kula.

¹⁰Awit kula mangan awu kaya roti, lan ombèn-ombèn kula, kula tyampuri luh.

¹¹Kedadian ngono kuwi awit sangka nesu lan bebendu Panjenengan, kula Panjenengan junjung terus Panjenengan untyalké.

¹²Dina-dina kula kaya ayang-ayang mundak dawa, lan kula déwé alum kaya suket.

¹³Nanging, duh GUSTI, Panjenengan sing njagong ing sak lawasé, lan asma Panjenengan tetep turun-temurun.

¹⁴Panjenengan déwé bakal ngadek ngekèki kawelasan marang Sion, awit wis teka waktuné dikèki kawelasan, wis teka ing wantyiné.

¹⁵Awit para abdi Panjenengan pada seneng marang watu-watuné, lan pada krasa melas marang remukané.

¹⁶Para bangsa terus pada trésna marang asmané GUSTI, lan kabèh para ratu ing sak lumahé bumi marang kaluhuran-Né,

¹⁷yèn GUSTI wis mbangun Sion lan wis ngétok karo nganggo kamulyan-Né

¹⁸lan wis ngrungokké marang pandongané para wong sing ngalami mlarat, lan ora ngrèmèhké marang pandongané.

¹⁹Bab iki bèn ditulis kanggo para turunan sing mbésuk, nganti bangsa sing bakal dititahaké pada ngluhurké GUSTI,

²⁰awit Gusti wis weruh sangka panggonané sutyi sing luhur, lan GUSTI wis weruh sangka swarga nang bumi,

²¹perlu ngrungokké sambaté wong paukuman, lan ngluwari para wong sing wis dityawiské kanggo pati,

²²supaya asmané GUSTI dikabarké ing Sion, lan Panjenengané pinujiné ing Yérusalèm,

²³yèn para bangsa lan kabèh kraton nglumpuk, pada ngabekti marang GUSTI.

²⁴Panjenengané wis nugel kekuwatanku ing dalan, lan umurku dityendekké.

²⁵Omonganku mengkéné: “Duh Gusti Allah kula, Panjenengan supaya aja njupuk kula ing separoné umur kula! Taun-taun Panjenengan kuwi tetep urip turun-temurun!”

²⁶Waktu mbiyèn Panjenengan wis nelesi bumi, lan langit kuwi gawéané tangan Panjenengan.

²⁷Kuwi kabèh bakal lebur, nanging Panjenengan déwé sing tetep urip, lan liyané pada lungset kaya salin kasusahan, bakal Panjenengan malihké kaya jubah, terus pada malih rupa,

²⁸nanging Panjenengan déwé ora malih, lan taun-taun Panjenengan ora bakal ana watesé.

²⁹Anaké para abdi Panjenengan pada bakal manggon karo tentrem, lan turunané pada tetep urip ing ngarepé Panjenengan.