Read Caribbean Javanese Masmur 103 Bible Online

Masmur 103 - Caribbean Javanese bible

Masmur 103

¹Masmuré Daved. Duh nyawaku, memujia marang GUSTI! Hé! isiné batinku kabèh, memujia marang asmané sing sutyi!

²Duh nyawaku, memujia marang GUSTI, lan aja lali marang kabèh kabetyikané!

³Panjenengané sing ngapura sak kabèhé kesalahanmu, lan maraské sak kabèhé lelaramu.

⁴Sing ngentasaké uripmu sangka kubur, lan makutani kowé karo katrésnan lan kawelasan,

⁵sing mareki kekarepanmu karo apa sing apik, nganti kowé dienomké menèh kaya manuk garuda.

⁶GUSTI ngekèki adil lan sing bener marang kabèh wong sing dianiaya.

⁷Gusti wis nduduhké dalan-dalané marang Moses, lan penggawéan-penggawéan-Né marang wong Israèl.

⁸GUSTI kuwi welas lan trésna, gedé sabaré lan lubèr katrésnan-Né;

⁹ora tansah nesoni, enggoné nesu ora selawasé.

¹⁰Sing ditindakké marang kita ora tanding karo dosa kita, enggon-Né ngekèki balesan marang kita ora sak boboté karo kesalahan kita,

¹¹nanging sak pira duwuré langit ngungkuli bumi, ya semono gedéné katrésnan-Né kanggo para wong sing ngabekti marang Panjenengané;

¹²sak pira adohé wétan sangka kulon, ya semono enggoné ngedohké panerak kita sangka kita.

¹³Kaya bapak enggoné nduwé kawelasan marang anak-anaké, ya kaya mengkono GUSTI enggoné ngekèki kawelasan marang para wong sing ngajèni Panjenengané.

¹⁴Awit Panjenengané ngerti kita kuwi sangka apa, lan éling yèn kita iki lebu.

¹⁵Nanging manungsa kuwi dina-dinané kaya suket, kaya kembang ing ara-ara, kaya mengkono enggoné ngembang;

¹⁶yèn keterak angin, terus wis ora ana, tilas panggonané wis ora kenal marang dèwèké menèh.

¹⁷Nanging katrésnané GUSTI, kuwi wiwit ing kelanggengan, nganti tekan ing kelanggengan, kanggo para wong sing ngabekti marang Panjenengané, uga keadilané kanggo para anak putuné,

¹⁸kanggo para wong sing pada nyekel perjanjian-Né lan sing éling nindakké, angger-anggeré Gusti.

¹⁹GUSTI wis nguwatké dampar-Ré ing swarga, lan kraton-Né ngwasani samubarang kabèh.

²⁰Hé para mulékaté, para suradadu sing gagah sing nglakoni apa préntahé Gusti, karo ngrungokké swarané tembungé, pada memujia marang GUSTI.

²¹Hé kabèh suradadu-Né lan abdi-Né sing nglakoni kekarepan-Né, pada memujia marang GUSTI.

²²Hé kabèh sing digawé, ing sak tanah pangwasan-Né, pada memujia marang GUSTI! Hé nyawaku, memujia marang GUSTI.