Read Caribbean Javanese Masmur 104 Bible Online

Masmur 104 - Caribbean Javanese bible

Masmur 104

¹Hé! nyawaku pasraha pamuji marang GUSTI! Duh GUSTI, Gusti Allah kula, Panjenengan kuwi luwih gedé, Panjenengan nganggo klambiné kraton gemebyar.

²Panjenengan sing nganggokké pepadang dadi kemul, mbèbèr langit kaya tarup.

³Panjenengan nggawé kamar-kamar nduwur ing banyu, sing ndadèkké mendung dadi tumpakané Panjenengan, sing mlaku ing nduwuré swiwiné angin,

⁴Panjenengan ndadèkké angin dadi kongkonan, lan geni murup dadi para peladèn Panjenengan.

⁵Sing ndasari bumi ing antyik-antyiké, terus ora gonjang-ganjing selawas-lawasé.

⁶Panjenengan tutupi karo segara gedé, banyuné munggah ngungkuli gunung-gunung.

⁷Banyu iki mblayu wedi marang getakan-Mu, mblayu bingung awit sangka swara gluduk-Mu,

⁸munggah ing gunung, medun ing juglangan, marang panggonan sing wis Panjenengan tetepké kanggo banyu mau.

⁹Watesé Panjenengan tetepké, ora bakal dilangkahi, ora bakal mbalik ngelepi bumi.

¹⁰Panjenengan sing ngilèkké banyu nang legokan-legokan, mili ing sela-selané gunung-gunung,

¹¹ngombèni kabèh kéwan-kéwan ing ara-ara, ngilangi ngelaké kimar alasan,

¹²ing tyedaké dipanggoni karo manuk-manuk ing awang-awang, sing pada ngotyèh ing antarané godong-godongan.

¹³Panjenengan sing ngekèki ngombé marang gunung-gunung sangka kamar nduwur-Mu, bumi warek awit sangka wohé penggawéan-Mu.

¹⁴Panjenengan sing nukulaké suket kanggo kéwan-kéwan, lan tetukulan, supaya digunakké karo manungsa, nganti ngetokké pangan sangka njeruhné lemah,

¹⁵uga anggur sing mbungahké atiné manungsa, sing nggawé praupané manungsa sumringah awit sangka lenga, lan roti sing nyegeraké atiné manungsa.

¹⁶Wit-witané GUSTI pada warek, wit tyemara ing Libanon tanduran-Né,

¹⁷panggonan susuhé manuk-manuk, manuk sing ngenggoni wit beros;

¹⁸gunung-gunung sing duwur dadi panggonané wedus alasan, lan puntuk-puntuk dadi panggonan delikané kantyil.

¹⁹Panjenengan sing ndadèkké mbulan dadi tanggalan; srengéngé sing ngerti waktu anggèné mingslep.

²⁰Yèn Panjenengan nekakké pepeteng, terus dadi wengi, ing waktu kuwi kabèh kéwan-kéwan ing alasan pada kluyuran.

²¹Singa nom pada nggeruh-nggeruh butuh memangsa, lan ngarep-arep pangané sangka Gusti Allah.

²²Ing wantyi njedulé srengéngé pada ngumpul, lan ngglétak ing guwa pandelikané.

²³Nanging manungsa terus budal menyang penggawéané, lan menyang penggawéané nganti ing wantyi mbengi.

²⁴Tenan okèh banget sing digawé karo Panjenengan kuwi, duh GUSTI, kabèh iki Panjenengan dadèkké karo kawityaksanan; sak kabèhé bumi kebak karo penggawé Panjenengan.

²⁵Lah kuwi segara, gedé lan jembar panggonané, ing kono kemruwet kéwan-kéwan gedé tyilik, tanpa kena diitung okèhé.

²⁶Ing kono kapal-kapal pada lelungan, lan Léwiatan, sing Panjenengan dadèkké, Panjenengan nggawé dedolanan.

²⁷Kabèh pada ngarep-arep marang Panjenengan, supaya dikèki pangan ing wantyiné.

²⁸Yèn Panjenengan kèkké, terus ditampa, yèn Panjenengan megarké tangan Panjenengan, kabèh pada warek karo sing betyik.

²⁹Yèn Panjenengan ndelikké praupan Panjenengan, kabèh pada gragapan; yèn Panjenengan njupuk nyawané, terus pada mati, lan mulih dadi lebu menèh.

³⁰Yèn Panjenengan ngekèkké Roh Panjenengan, terus pada dadi, lan lumahé bumi Panjenengan dadèkké anyar.

³¹Kaluhurané GUSTI langgeng ing selawasé, GUSTI bungah-bungah awit sangka penggawéan-Né.

³²Panjenengané sing ngewaské bumi ndadèkké gemeteré, gunung-gunung dikongkon, terus ngetokké kebul.

³³Sak jeku urip aku arep ngidung kanggo GUSTI, selawasé aku ana, aku arep ngidung masmur, marang Gusti Allah.

³⁴Supaya enggonku nggagas-nggagas ing ngarepé iki dirungokké karo Panjenengané! Aku bakal tansah bungah-bungah awit sangka GUSTI.

³⁵Para wong dosa ing bumi bèn entèk, lan para wong duraka bèn ora ana menèh! Hé! nyawaku, ngluhurna asmané GUSTI! Haléluya.