Read Caribbean Javanese Masmur 105 Bible Online

Masmur 105 - Caribbean Javanese bible

Masmur 105

¹Pada ngluhurké GUSTI, pada sebuten asmané, penggawéan-Né pada kenalké ing antarané para bangsa!

²Pada ngidunga kanggo Panjenengané, kidungna karo masmur; sak kabèhé penggawéan-Né sing nggumunaké pada tyeritakna!

³Pada gunggung-gunggungen asma-Né sing sutyi, atiné para wong sing pada nggolèki GUSTI bèn pada bungah.

⁴Pada nggolèkana GUSTI lan kekuwatan-Né, pada tansah nggolèkana praupan-Né!

⁵Pada ngélingana marang mujijat sing wis pada ditindak-Ké, tanda-tanda mujijat lan keadilan sing diutyap-Ké,

⁶hé para anak-putuné Abraham, abdiné, hé para anaké Yakub, pilihan-Né!

⁷Ya Panjenengané kuwi GUSTI, Gusti Allah kita, keadilan-Né rata ing sak lumahé bumi.

⁸Panjenengané éling karo perjanjiané nganti tekan sak lawas-lawasé, ya kuwi pitutur-pitutur sing wis didawuh-Ké marang 1000 turunan,

⁹sing wis ditalèni karo Abraham, lan sumpah marang Isak;

¹⁰sing ditetepaké dadi pernatan kanggo Yakub, dadi perjanjian langgeng kanggo bangsa Israèl,

¹¹mengkéné tembungé Gusti: “Kowé bakal Tak wènèhi negara Kanaan, dadi negara panduman sing ditemtokké kanggo kowé.”

¹²Waktu tyatyahé durung sak piraa, mung setitik, dadi wong mantya ing kono.

¹³Lan pada nglembara sangka panggonané bangsa sing siji, menyang panggonané bangsa liyané, sangka kraton sing siji menyang panggonané taleré bangsa liyané;

¹⁴Panjenengané ora nglilani yèn nganti pada dianiaya karo sapa-sapa, para ratu pada diukum awit sangka dèwèké kabèh;

¹⁵tembungé: “Para sing Tak jebatani aja nganti kowé ngganggu-gawé, lan aja nindakké sing ala marang para nabi-Ku!”

¹⁶Waktu Panjenengané nekakké pailan ing negara kono, lan sak kabèhé tandon pangan dientèkké,

¹⁷terus ana wong sing diutus ndisiki dèwèké kabèh: Yosèf sing didol dadi batur tukon.

¹⁸Sikilé diketyèk, guluné diranté karo wesi,

¹⁹nganti tekan ing waktuné tembungé Gusti kelakon, lan putusané GUSTI mbenerké dèwèké.

²⁰Ratu terus ngongkon ngluwari, pangwasa para bangsa pada ngluwari dèwèké.

²¹Terus didadèkké pemimpiné omahé, lan ngwasani apa sak duwèké kabèh,

²²dililani ngwasani para penggedéné abdiné sak karepé piyambaké, lan mulangi kawityaksanan marang para pinituwané.

²³Mengkono Israèl terus teka ing negara Egipte, lan Yakub dadi wong mantya ing tanahé Ham.

²⁴Gusti Allah terus ndadèkké umaté tangkar-tumangkar, didadèkké kuwat ngungkuli para mungsuhé;

²⁵atiné mungsuhé mau diwalik nganti pada sengit marang umaté Gusti Allah, lan abdi-Né pada ditindes.

²⁶Gusti Allah terus ngutus Moses, abdi-Né, lan imam Harun pilihan-Né.

²⁷Loro-loroné nganakké tanda-tanda-Ku ing tengahé, lan mujijat ing tanah Ham.

²⁸Gusti nekakké peteng ndedet, nganti awan dadi peteng, nanging pada mbangkang marang tembungé;

²⁹banyuné didadèk-Ké malih dadi getih, lan iwak-iwaké pada dipatèni.

³⁰Kodok-kodok pada uyel-uyelan ing negarané, malah nganti tekan ing kamar-kamaré ratuné.

³¹Gusti Allah ngetokké tembung, terus katekan laler, lan lemut-lemut ing sak tanahé kabèh;

³²Panjenengané nibakké udan ès dadi gantiné udan ing kono, lan geni sing mulat-mulat ing negarané;

³³wit anggur lan anjir pada dirubuhké, lan kabèh wit-witan ing panggonané disempali.

³⁴Gusti Allah ngetokké tembung, terus ana walang, lan kuwi walang lumpatan sing tanpa itungan okèhé,

³⁵terus mangan sak kabèhé tetukulan ing negarané, lan mangan pametuné lemahé.

³⁶Gusti matèni sak kabèhé anak mbarep ing negarané, wohé kekuwatané sing wiwitan.

³⁷Umaté terus dituntun metu karo nggawa slaka lan emas, lan tunggalé kabèh taleré ora ana sing kejengklok siji-sijia.

³⁸Waktu metuné wong Egipte pada bungah-bungah, awit wong Egipte pada katekan wedi marang dèwèké kabèh.

³⁹Gusti Allah nggelarké mendung digawé mayungi umaté, lan geni sing madangi ing wayah mbengi.

⁴⁰Para leluhuré pada ndedonga, Gusti Allah terus nekakké manuk gemak, lan mareki umaté karo roti sangka langit.

⁴¹Gusti mbengkahké watu, terus ana banyu mantyur, sing mili kaya kali ing lemah garing.

⁴²Kuwi awit Panjenengané éling marang tembungé sing sutyi, marang Abraham abdi-Né.

⁴³Gusti Allah nuntun umaté metu karo bungah-bungah, lan pilihan-Né karo surak-surak.

⁴⁴Pada dikèki negarané para bangsa, nganti pada nampa olèh-olèhé rekasané para bangsa,

⁴⁵supaya pada tetep nindakké pernatané Gusti Allah, lan nggatèkké marang sak kabèhé piwulangé. Haléluya!