Read Caribbean Javanese Masmur 106 Bible Online

Masmur 106 - Caribbean Javanese bible

Masmur 106

¹Haléluya! Pada ngluhurna GUSTI, awit Panjenengané kuwi betyik! katrésnan-Né kuwi langgeng sak lawasé.

²Sapa sing bisa nyritakké penggawéané GUSTI sing ngidap-idapi, lan ngabarké kabèh pujian marang Panjenengané?

³Rahayu wong sing netepi angger-angger, sing nindakké keadilan tekan selawas-lawasé.

⁴Duh GUSTI, supaya Panjenengan élingi kula, awit sangka kawelasan-Mu marang umat Panjenengan, Panjenengan supaya nggatèkké kula, awit keslametan sangka Panjenengan,

⁵supaya kula bisaa weruh kabekjané para pilihan Panjenengan, supaya kula mèlu bungah ing njeruhné kebungahané umat Panjenengan, lan supaya bisa ngétokké panggunggung bareng karo umat duwèké Panjenengan piyambak.

⁶Kita karo para leluhur kita, wis pada nandangi dosa, kita wis pada kesalahan lan nandangi duraka.

⁷Para leluhur kita waktu ing negara Egipte, pada ora ngerti marang mujijaté Panjenengan, pada ora éling marang gedéné kawelasan Panjenengan, malah pada nglawan marang sing Mahaluhur, ing pinggiré segara Abang.

⁸Nanging pada ditulungi slamet karo Gusti Allah awit sangka asma-Né, supaya pada ngerti marang kekuwatan-Né.

⁹Segara Abang dinesoni nganti dadi asat, para leluhur kita terus pada dilakokké ing segara gedé, kaya liwat ing ara-ara samun.

¹⁰Kaya mengkono enggoné pada diluwari sangka tangané wong sing sengit, lan pada diluwari sangka tangané mungsuhé.

¹¹Mungsuhé pada ketutupan karo banyu, ora ana sing kèri siji-sijia.

¹²Waktu kuwi para leluhur Panjenengan terus pada ngandel marang pitutur-Mu, lan ngidungké pamuji marang Panjenengané.

¹³Nanging terus gelis lali marang penggawéan-Né, lan ora ngentèni marang pituduhé;

¹⁴pada ngumbar kekarepané ing segara wedi, lan njajal marang Gusti Allah ing ara-ara samun.

¹⁵Pada diuja kekarepané, nanging awaké uga terus diganjar lelara nglayung.

¹⁶Sakwisé mengkono pada mèri marang Moses ing tarupé, lan marang imam Harun, abdiné GUSTI sing sutyi.

¹⁷Bumi terus bengkah nguntal Datan, lan nutupi grombolané Abiram.

¹⁸Ana geni sing mulat-mulat ing tengahé grombolan mau, lan urupé nggosongké para wong sing duraka kuwi.

¹⁹Ing gunung Horeb pada nggawé retya pedèt, lan sujut marang retya tyitakan;

²⁰pada ngijoli kamulyan-Né karo ujut sapi lanang sing mangan suket.

²¹Pada lali marang Gusti Allah Juruslameté, sing wis nindakké perkara-perkara sing gedé ing negara Egipte;

²²penggawéan-penggawéan sing nggumunaké ing tanahé Ham, penggawéan-penggawéan sing ngidap-idapi ing pinggiré segara Abang.

²³Mulané Gusti ngomong bakal matèni para leluhur kita, yèn ora Moses pilihan-Né, nengahi ing ngarepé Gusti, nyirep nesu-Né nganti Panjenengané ora sida ngentèkké para leluhur kita.

²⁴Para leluhur kita pada ngemohi negara sing apik kuwi, pada ora ngandel marang pangandika-Né,

²⁵malah pada pating kedumel ing tarupé, lan ora ngrungokké marang swarané GUSTI.

²⁶Mulané Gusti terus ngatyungké tangan-Né marang para leluhur kita, arep pada dipatèni ing ara-ara samun,

²⁷lan turunané bakal pada dibuyaraké ing antarané para bangsa, lan disebar ing negara-negara.

²⁸Uga pada rumaket marang Baal péor, lan mangan kurban-kurban sing dibelèh kanggo wong mati.

²⁹Dadi pada nggawé nesuné atiné Gusti awit sangka penggawéné, mulané pada katekan bebendu.

³⁰Pinéhas terus tandang nindakké pengadilan, nganti bebenduné terus sirep.

³¹Bab kuwi kepitung dadi penggawé betyik turun-temurun ing sak lawas-lawasé.

³²Ing sak tyedaké banyu ing Mériba, para leluhur kita pada nggawé nesuné Gusti, Moses terus katekan karo kangèlan, awit sangka para leluhur kita,

³³awit para leluhur kita pada njalari nesuné Moses, nganti Piyambaké ketrutyut enggoné ngomong.

³⁴Para bangsa pada ora dientèkké, kaya sing wis dipréntahké karo GUSTI marang para leluhuré,

³⁵nanging pada dadi siji karo para bangsa mau, lan niru pertingkahé,

³⁶brahalané pada disembah, nganti dadi jiret kanggo para leluhuré.

³⁷Pada ngurbanké anak-anaké lanang, lan anak-anaké wadon marang para roh-roh ala,

³⁸dadi pada ngutahké getihé wong sing ora salah, ya kuwi getihé anaké lanang lan wadon, sing pada dibelèh dadi sajèn marang brahalané wong Kanaan, nganti negara kono terus reget awit sangka enggoné utang getih mau.

³⁹Pada najisaké awaké déwé karo pertingkahé kuwi, lan pada laku bédang ing sak njeruhné penggawéné.

⁴⁰Mulané nesuné GUSTI mulat-mulat marang umaté, lan serik marang bangsa duwèké piyambak kuwi,

⁴¹terus pada dipasrahké ing tangané bangsa liyané, terus ditelukaké karo wong sing pada nyengiti.

⁴²Pada ditindes-tindes karo mungsuhé, terus teluk marang pangwasané.

⁴³Wis bola-bali enggoné pada dipitulungi karo Gusti Allah, nanging pada nglawan waé karo rantyaman-rantyaman-Né, pada kedelep ing sak njeruhné kesalahané.

⁴⁴Nanging Gusti Allah weruh kangèlané, waktu krungu sambaté.

⁴⁵Panjenengané éling marang perjanjiané awit sangka para leluhur kita, nganti getun awit sangka gedéné katrésnan-Né.

⁴⁶Pada dililani olèh kawelasan sangka kabèh wong sing pada nyekel.

⁴⁷Duh GUSTI, Gusti Allah kita, kita supaya Panjenengan slametké, kita pada klumpukna sangka antarané para bangsa, supaya kita kabèh pada ngluhurké marang asma Panjenengan sing sutyi, lan pada gedé ing ati karo pamuji marang Panjenengan.

⁴⁸Pinujia GUSTI, Gusti Allahé Israèl, sangka kelanggengan tekan ing kelanggengan lan umaté kabèh pada ngutyapké: “Amin”. Haléluya!