Read Caribbean Javanese Masmur 107 Bible Online

Masmur 107 - Caribbean Javanese bible

Masmur 107

¹Pada pasraha maturkesuwun marang GUSTI, awit Panjenengané kuwi apik! Awit katrésnan-Né kuwi langgeng ing selawasé.

²Mengkono tembungé para wong sing pada ditebus karo GUSTI, sing ditebus sangka pangwasané sing nggawé susah,

³sing diklumpukké sangka negara-negara, sangka negara wétan lan kulon, sangka lor lan sangka kidul.

⁴Ana wong sing pada nglembara ing ara-ara samun, ora nemu dalan sing tekan ing kuta sing dienggoni karo wong.

⁵Pada kaliren lan ngelak, nyawané kesel banget.

⁶Sak njeruhné kangèlané terus pada sambat marang GUSTI, terus pada diluwari sangka sangsarané,

⁷diduduhi dalan sing bener, nganti terus tekan kuta sing dienggoni karo wong.

⁸Wongé bèn pada maturkesuwun marang GUSTI, awit sangka katrésnan-Né, awit sangka mujijaté Gusti marang para anak-anaké manungsa,

⁹awit Gusti gelem mareki nyawané wong sing ngelak, lan nyawa sing kaliren diwarekaké karo kabetyikan.

¹⁰Ana wong sing lungguh ing pepeteng sing peteng ndedet, dikurung karo sangsara lan wesi.

¹¹Awit pada nglawan marang pepakoné Gusti Allah, lan ngrèmèhké pituduhé sing Mahaluhur,

¹²mulané ditelukaké atiné karo kasusahan, pada kejlungup, ora ana sing nulungi.

¹³Ing sak njeruhné kangèlané kuwi, bareng pada sambat marang GUSTI, terus pada diluwari sangka kasangsarané,

¹⁴diluwari sangka pepeteng sing peteng ndedet, lan ranténé pada dipedoti.

¹⁵Wong kuwi bèn pada ngluhurké marang GUSTI awit sangka katrésnan-Né, lan mujijaté Gusti marang para anak-anaké manungsa;

¹⁶awit Gusti wis gelem ngrusak lawang-lawang slaka, lan nugeli slorok-sloroké wesi.

¹⁷Ana wong sing pada ngalami lara awit sangka penggawéné dosa, lan disiksa awit sangka kesalahané.

¹⁸Wis pada jelèh marang sak rupané pangan, lan wis pada tekan ing gapurané pati.

¹⁹Ing sak njeruhné kasusahané terus pada sambat marang GUSTI, terus pada diluwari sangka kasusahané.

²⁰Gusti ngekèki tembung lan terus pada diwaraské, pada utyul sangka luwangé kubur.

²¹Wong kuwi mau bèn pada maturkesuwun marang GUSTI, awit sangka katrésnan-Né, lan awit sangka mujijaté Gusti marang para anak-anaké manungsa,

²²lan bèn pada masrahaké kurban maturkesuwun lan nyritakké penggawéané Gusti Allah karo surak-surak.

²³Ana wong sing nyabrangi segara karo kapal, sing nindakké dagang ing segara sing jembar,

²⁴pada weruh penggawéané GUSTI lan mujijaté ing telengé segara.

²⁵Gusti ngomong lan nekakké lésus, sing ngumbulké ombak-ombaké,

²⁶wongé pada mumbul tekan langit lan pada medun ing segara gedé, nyawané remuk awit sangka tyilaka kuwi,

²⁷pada mumet lan senpoyongan kaya wong mendem, lan entèk akalé.

²⁸Ing sak njeruhné kangèlané kuwi terus pada sambat marang GUSTI, terus pada diluwari sangka kangèlané;

²⁹lesusé disirep lan ombaké segara pada anteng.

³⁰Wong-wong mau pada bungah, awit kahanané kabèh wis tentrem, lan terus dituntun menyang kuta sing disenengi.

³¹Wong kuwi bèn pada masrahaké maturkesuwun marang GUSTI, awit sangka katrésnan-Né, awit sangka mujijaté Gusti marang para anak-anaké manungsa.

³²Wong mau bèn pada ngluhurké Gusti ing pasamuané umat kuwi, lan memuji marang Panjenengané ing kumpulané para pinituwa.

³³Kali-kali didadèkké ara-ara samun, lan sumberé banyu didadèkké lemah bongkor,

³⁴negara subur didadèkké lemah asin, sing mengkono kuwi awit sangka penggawé alané wong sing pada ngenggoni,

³⁵ara-ara samun didadèkké blumbang, lan lemah bongkor didadèkké sumber banyu,

³⁶wong sing kaliren terus pada didèkèkké ing kono, terus pada mbangun kuta sing dienggoni,

³⁷terus pada nyebar ing kebon lan nggawé kebon anggur, sing ngetokké woh-wohan kanggo pametuné.

³⁸Nanging wong kuwi banget diberkahi karo Gusti, nganti terus banget enggoné tambah-tambah, lan kéwan-kéwané pada didadèkké manak-manak.

³⁹Nanging terus suda-suda lan ngrekasa, awit sangka pangwasané sangsara lan kasusahan.

⁴⁰Gusti terus ngesokké kewirangan marang para penggedéné, pada didadèkké nglembara ing ara-ara samun, sing ora ana dalané.

⁴¹Nanging wong mlarat pada dislametké supaya ora ditindes, lan anak putuné pada ditangkar tumangkarké kaya kumpulan wedus kaé.

⁴²Para wong bener pada weruh terus pada bungah, nanging kabèh sing ala pada mingkem.

⁴³Sapa wong sing wityaksana? Kuwi betyik gondèlana marang perkara kuwi kabèh, lan gatèkna marang katrésnané GUSTI.