Read Caribbean Javanese Masmur 109 Bible Online

Masmur 109 - Caribbean Javanese bible

Masmur 109

¹Kanggo juru penyanyi. Masmuré Daved. Duh Gusti Allah pujian kula, Panjenengan supaya aja meneng,

²awit tutuké wong duraka karo tutuké wong goroh mangap marang kula, lan kula diunèn-unèni karo ilat goroh,

³kula diserang karo tembung-tembung sesengitan, lan merangi tanpa sebab.

⁴Kanggo balesané katrésnan kula pada musuhi kula, nanging pada kula ndongakké,

⁵kabetyikan kula diwales ala, lan katrésnan kula kewales sengit.

⁶“Angkaten wong duraka sing ngadili dèwèké lan tukang nuntut ing sisih tengené.

⁷Yèn diadili bèn metu dadi wong salah, lan pandongané dadi dosa;

⁸umuré bèn kélong, pangkaté dijukuk karo wong liya;

⁹anaké pada dadia lola, lan bojoné dadia randa.

¹⁰Anak-anaké ya bèn nglembara ora karuan lan ngemis, lan ditundung sangka jugrukané omahé.

¹¹Sing nagih njikuki sembarang duwèké, lan wong liya pada ngrebuta olèh-olèhé ngrekasané;

¹²aja nganti tetep urip olèh katrésnan kawelasané wong, lan aja nganti ana sing melasi marang anaké sing wis dadi lola;

¹³turun-temuruné pada entèka, lan jenengé dientèkké ing turun tyandaké,

¹⁴alané para leluhuré diéling-éling ing ngarepé GUSTI, lan dosané ibuné aja nganti dilebur,

¹⁵ya bèn tansah dipikir karo GUSTI, supaya pengéling-éling kanggo wong kuwi dientèkké sangka bumi,

¹⁶awit ora éling nindakké katrésnan, nanging ngoyak-oyak wong sing kasusahan lan mlarat lan sing semplak atiné nganti pada nemoni pati.

¹⁷Awit seneng ngutyapké sepata-sepata, mila pada kenaa karo sepata-sepatané déwé; awit ora seneng marang berkah, mila supaya berkah ya ngedohi sangka dèwèké.

¹⁸Bebendu dienggo kaya klambiné, mila ngresep ing awaké kaya banyu, lan kaya lenga ing balungé,

¹⁹ya dadia kaya sandangan sing dienggo, lan sabuk sing tansah dienggo.

²⁰Kabèh kuwi dadia upahé, ganjarané GUSTI marang wong sing pada ndakwa kula, lan sing pada ngèlèk-èlèkké kula.”

²¹Nanging Panjenengan, duh GUSTI, Gusti kula, Panjenengan supaya tumindak kanggo kula awit sangka asma Panjenengan, kula supaya Panjenengan tulungi awit sangka kawelasan Panjenengan sing betyik kuwi.

²²Kula ngalami sangsara lan kekurangan lan ati kula dijojoh-jojoh ing batin kula,

²³kula ngilang kaya ayang-ayang sing mundak dawa, kula dikebutké kaya walang.

²⁴Dengkul kula lemes awit enggèn kula pasa, lan awak kula dadi kuru, kentèkan gajihé.

²⁵Kula wis dadi tyatyatané wong-wong kuwi, saben weruh kula pada gèdèk-gèdèk.

²⁶Duh GUSTI, Gusti Allah kula, kula supaya Panjenengan tulungi, kula supaya Panjenengan tulungi, tyotyok karo kawelasan Panjenengan,

²⁷supaya pada weruh, yèn kuwi tangan Panjenengan, mung Panjenengan, duh GUSTI, sing nindakké kuwi.

²⁸Ya bèn pada nyepatani, Panjenengan bakal mberkahi, ya bèn mungsuh-mungsuh pada ngalami kisinan, nanging abdi Panjenengan olèha kebungahan.

²⁹Wong sing pada nglawan kula supaya pada klambènan kisinan, pada dikebaki karo kewirangan kaya nganggo jubah.

³⁰Banget enggonku arep maturkesuwun marang GUSTI karo tutukku, lan Panjenengané arep tak luhurké ing sak tengahé wong okèh,

³¹awit Gusti ngadek ing sak tengené wong ringkih, arep ngluwari sangka para wong sing ngukum.