Read Caribbean Javanese Masmur 115 Bible Online

Masmur 115 - Caribbean Javanese bible

Masmur 115

¹Duh GUSTI, aja marang kita, aja marang kita, mung marang asma Panjenengan dikèki kamulyan, awit sangka kawelasan-Mu, awit sangka kasetian-Mu.

²Kenèng apa para bangsa nganti pada bakal ngomong: “Gusti Allahé wong-wong kuwi ing ngendi?”

³Gusti Allah kita ing swarga; nindakké kekarepan-Né.

⁴Brahalané para bangsa slaka lan emas, garapané tangané manungsa;

⁵pada nduwé tutuk, nanging ora bisa ngomong; pada nduwé mripat, nanging ora bisa weruh;

⁶pada nduwé kuping, nanging ora bisa ngrungokké; pada nduwé irung, nanging ora bisa ngambu;

⁷tangané ana, nanging ora bisa nggrayahi; sikilé ana, nanging ora bisa mlaku, ora bisa nyuwara sangka njeruh guluné;

⁸para wong sing nggawé kuwi pada dadia sak pepadané mengkono uga sak rupané wong sing pertyaya marang kuwi.

⁹Hé Israèl, pertyayaa marang GUSTI, Panjenengané sing mitulungi lan dadi tamèngé.

¹⁰Hé turunané imam Harun! Pertyayaa marang GUSTI, Panjenengané sing mitulungi lan dadi tamèngé.

¹¹Hé para wong sing ngabekti marang GUSTI, pada pertyayaa marang GUSTI, Panjenengané sing mitulungi lan dadi tamèngé.

¹²GUSTI wis éling marang kita bakal ngekèki berkah, bakal mberkahi turunané Israèl, bakal mberkahi turunané imam Harun,

¹³bakal mberkahi para wong sing ngabekti marang GUSTI, dadia sing tyilik dadia sing gedé.

¹⁴GUSTI supaya ndadèkké kowé pada tangkar tumangkar, ya kowé lan anak-putumu.

¹⁵Kowé pada bakal diberkahi karo GUSTI, sing nggawé langit lan bumi.

¹⁶Langit kuwi langit duwèké GUSTI, nanging bumi wis dikèkké Gusti marang para anak-anaké manungsa.

¹⁷Duduk wong mati sing bakal pada ngluhurké GUSTI, lan duduk kabèh wong sing wis medun ing jagat suwung,

¹⁸nanging kita, kita bakal pada memuji marang GUSTI, wiwit saiki nganti tekan sak lawas-lawasé. Haléluya!