Read Caribbean Javanese Masmur 116 Bible Online

Masmur 116 - Caribbean Javanese bible

Masmur 116

¹Aku trésna marang GUSTI awit ngrungokké swaraku lan penjalukku,

²kupingé Gusti ngrungokké aku, mulané sakjeku urip aku bakal nyebut marang Panjenengané.

³Aku digubet karo taliné pati, lan dilawan karo rasa wedi marang ndonyané wong mati, lan ngrasakaké kangèlan lan kasusahan.

⁴Nanging aku nyebut asmané GUSTI: “Duh GUSTI, Panjenengan supaya ngluwari kula.”

⁵GUSTI kuwi maha trésna lan adil, Gusti Allah kita kuwi gedé kawelasan-Né.

⁶GUSTI kuwi njaga marang wong prasaja; aku wis lemes, nanging terus dipitulungi karo Panjenengané.

⁷Duh nyawaku, dadia ayem menèh, awit GUSTI wis ngapiki marang kowé.

⁸Ya, Panjenengan wis ngluwari kula sangka pati, lan mripat kula sangka luh, lan taler kula sangka sandungan.

⁹Aku dililani mlaku ing ngarepé GUSTI, ing negarané wong urip.

¹⁰Aku pertyaya, senajan nduwé tembung: “Banget temen enggonku ditindes.”

¹¹Ing sak njeruhné kebingunganku aku ngomong: “Manungsa kuwi pada goroh kabèh.”

¹²Apa sing tak nggawé balesan marang GUSTI, kanggo sak kabèhé katrésnan-Né marang aku?

¹³Aku arep ngangkat tuwungé keslametan lan arep nyebut asmané GUSTI,

¹⁴arep ngluwari janjiku marang GUSTI ing ngarepé umat Panjenengan kabèh.

¹⁵Patiné para katrésnan-Né kuwi larang regané ing ngarepé GUSTI.

¹⁶Duh GUSTI, kula kuwi abdi Panjenengan, ya tenan abdi Panjenengan, anaké abdi wadon Panjenengan; Panjenengan sing wis ngutyuli tali-banda kula.

¹⁷Kula bakal pasrah kurban maturkesuwun marang Panjenengan. Lan bakal nyebut asmané GUSTI.

¹⁸Tak bayar janjiku marang GUSTI ing ngarepé umat Panjenengan kabèh,

¹⁹ing platarané griyané GUSTI, ing sak tengahmu, hé Yérusalèm! Haléluya!