Read Caribbean Javanese Masmur 118 Bible Online

Masmur 118 - Caribbean Javanese bible

Masmur 118

¹Pada ngluhurna GUSTI, awit Panjenengané kuwi betyik! Awit katrésnan-Né kuwi langgeng ing sak lawas-lawasé.

²Israèl ngomonga: “Katrésnan-Né kuwi langgeng selawasé!”

³Turunané imam Harun ngomonga: “Katrésnan-Né kuwi langgeng selawasé!”

⁴Para wong sing ngabekti marang GUSTI pada ngomonga: “Katrésnan-Né kuwi langgeng selawasé!”

⁵Sak njeruhné kangèlan aku nyebut marang GUSTI. GUSTI terus nuruti penjalukku, aku dikèki lega;

⁶GUSTI nunggal karo aku, aku bakal ora wedi. Manungsa bisa nandangi apa marang aku?

⁷GUSTI nunggal karo aku lan mitulungi aku, aku bakal nganggep sepélé wong sing pada sengit marang aku.

⁸Luwih betyik ngungsi marang GUSTI tenimbang ngendelké manungsa;

⁹luwih betyik ngungsi marang GUSTI tenimbang ngendelké para penggedé.

¹⁰Aku dikepung sak kabèhé bangsa ing asmané GUSTI, kabèh pada tak getyek.

¹¹Aku dikepung, kemput enggoné ngepung aku, ing asmané GUSTI, tak getyek.

¹²Kabèh pada ngepung aku kaya tawon, pada mulat-mulat kaya geniné eri, ing asmané GUSTI, pada tak getyek banjur mundur.

¹³Aku dijongkroké sak rosané nganti tiba, nanging GUSTI mitulungi aku.

¹⁴GUSTI kuwi dadi kekuwatanku lan masmurku,, Panjenengané wis dadi keslametanku.

¹⁵Ing tarupé para wong bener ana swara surak-surak lan kemenangan: “Tangané tengen GUSTI nindakké kekuwatan,

¹⁶Tangané tengen GUSTI bisa ngangkat; Tangané tengen GUSTI nindakké kekuwatan!”

¹⁷Aku ora bakal mati, nanging urip lan aku bakal nyritakké penggawéané GUSTI.

¹⁸GUSTI banget enggoné ngrangkèt marang aku, nanging aku ora dipasrahké marang pati.

¹⁹Aku dibukakké gapurané kabeneran, aku arep mlebu, arep ngluhurké GUSTI.

²⁰Iki gapurané GUSTI sing bakal dileboni karo para wong bener.

²¹Kula maturkesuwun marang Panjenengan, awit Panjenengan wis nuruti penjaluk kula lan Panjenengan wis dadi keslametan kula.

²² Watu sing ditampik karo para tukang nggawé omah kuwi wis dadi watu sing pojoké pondasi;

²³kedadian kuwi sangka GUSTI, lan nggumunaké ing pandelengé kita.

²⁴Iki dina sing digawé karo GUSTI, hayuk pada bungah-bungah lan seneng-seneng.

²⁵Duh GUSTI, Panjenengan supaya ngekèki kemenangan. Duh GUSTI, Panjenengan supaya ngekèki kabekjan.

²⁶Kaberkahan sing teka atas asmané GUSTI. Kita pada mberkahi kowé kabèh sangka griyané GUSTI.

²⁷GUSTI kuwi Gusti Allah, Panjenengané ngekèki pepadang marang kita, kurbané riyaya tyentyangen karo tali ing sungu-sunguné mesbèh.

²⁸Panjenengan kuwi Gusti Allah kita, kula arep memuji Panjenengan, duh Gusti Allah kula, Panjenengan bakal kula luhurké.

²⁹Pada memujia marang GUSTI, awit Panjenengané kuwi apik! Awit katrésnan-Né kuwi kanggo selawasé.