Read Caribbean Javanese Masmur 135 Bible Online

Masmur 135 - Caribbean Javanese bible

Masmur 135

¹Haléluya! Pada ngluhurna asmané GUSTI, pada luhurna, hé para abdiné GUSTI.

²Hé para wong sing pada teka ngladèni ing griyané GUSTI, ing platarané griyané Gusti Allah kita!

³Pada memujia marang GUSTI, awit GUSTI kuwi betyik, asmané pada luhurna karo masmur, awit kuwi apik!

⁴Awit GUSTI wis milih Yakub dadi duwèké, Israèl dadi katrésnan-Né.

⁵Tenan aku weruh, yèn GUSTI kuwi Mahaluhur, lan Gusti kita sing ngungkuli kabèh allah.

⁶GUSTI nindakké apa sing dadi karepé, ing swarga lan ing bumi, ing segara lan ing sak ubengé segara gedé.

⁷Gusti ndadèkké mendung mumbul sangka pungkasané bumi, nggawé bledèk sing mbarengi udan, angin dietokké sangka gedongé.

⁸Panjenengané sing matèni para anak mbarep ing negara Egipte, manungsa lan kéwan,

⁹uga nekakké tanda lan mujijat ing sak tengahmu, hé negara Egipte, nglawan marang Parao lan kabèh abdiné.

¹⁰Panjenengané sing merangi bangsa okèh, lan matèni ratu-ratu sing kuwat.

¹¹Sihon, ratuné bangsa Amori, Og, ratu negara Basan, lan sak kabèhé kraton negara Kanaan,

¹²lan tanahé dikèkké dadi tanah panduman, tanah panduman marang Israèl, umaté.

¹³Duh GUSTI, asma Panjenengan kuwi langgeng sak lawasé. Duh GUSTI, Panjenengan diéling-éling turun-temurun.

¹⁴Awit GUSTI kuwi bakal ngekèki keadilan marang umaté, lan bakal melasi marang para abdi-Né.

¹⁵Brahalané para bangsa kuwi slaka utawa emas, gawéané tangané manungsa,

¹⁶pada nduwé tyangkem nanging ora bisa ngomong, pada nduwé mripat, nanging ora bisa weruh,

¹⁷kupingé ana, nanging ora bisa ngrungokké, uga tyangkemé ya ora ana ambekané.

¹⁸Ya kaya mengkono kahanané para wong sing nggawé, lan kabèh wong sing pertyaya kuwi.

¹⁹Hé turunané Israèl, pada memujia marang GUSTI, hé para turunané imam Harun, pada pasraha pamuji marang GUSTI.

²⁰Hé turunané Lèwi, pada memujia marang GUSTI, hé, para wong sing ngabekti marang GUSTI, pada memujia marang GUSTI.

²¹GUSTI pasrahana pamuji sangka kuta Sion, Panjenengané sing manggon ing Yérusalèm. Haléluya!