Read Caribbean Javanese Masmur 139 Bible Online

Masmur 139 - Caribbean Javanese bible

Masmur 139

¹Kanggo juru penyanyi. Masmuré Daved. Duh GUSTI, Panjenengan sing njajaki lan weruh kula.

²Kula lungguh utawa ngadek Panjenengan weruh, Panjenengan ngerti obahé ati kula sangka kadohan.

³Panjenengan weruh yèn kula mlaku utawa ngasuh, lan sak mlaku kula Panjenengan ngertèni.

⁴Awit sak durungé ilat kula ngetokké tetembungan, sakjané Panjenengan wis weruh kuwi kabèh, duh GUSTI.

⁵Panjenengan ngurung kula sangka mburi lan sangka ngarep, lan tangan-Mu tansah Panjenengan tumpangké ing kula.

⁶Kaweruh sing mengkéné kuwi kliwat karo nggumunaké kanggo kula, duwuré nganti ora kenèng kula gayuh.

⁷Menyang ngendi enggèn kula lunga ngedohi Roh-Mu, menyang ngendi enggèn kula mlayu ngedohi ngarep-Mu?

⁸Yèn kula munggah menyang langit, Panjenengan ing kana, yèn kula nggelar ambèn kula ing ndonyané wong mati, Panjenengan ya ing kono.

⁹Yèn kula mabur nganggo swiwiné ésuké wétan, lan manggona ing pojokané segara,

¹⁰uga ing kono kula ketuntun karo tangan-Mu, lan digawa karo tangan-Mu tengen.

¹¹Yèn kula ngomonga: “Awakku dikebaki karo pepeteng lan pepadang ing sak ubengku dadia mbengi,”

¹²pepeteng iki ora nggawé peteng ing mripat-Mu, wengi ya dadi padang kaya awan, pepeteng pada kaya pepadang.

¹³Awit Panjenengan piyambak sing nggawé ginjel kula, Panjenengan sing nenun kula ing wetengé ibu kula.

¹⁴Kula matur kesuwun marang Panjenengan awit nggumunké lan ngidap-idapi kedadian kula, penggawéan-Mu kuwi nggumunaké, nyawa kula banget anggèné ngrumangsani bab kuwi.

¹⁵Balung-balung kula ora ana sing ketutupan ing ngarep-Mu, waktu kula digawé ing pandelikan, lan digawé ing telengé bumi.

¹⁶Mripat Panjenengan weruh kula, waktu kula ijik ing weteng, kabèh kuwi wis pada ditulis ing kitab-Mu, dina-dina sing bakal dianakké, waktu siji waé durung ana.

¹⁷Duh Gusti Allah, tenan angèlé pikiran-Mu kuwi, tenan okèh banget gunggungé!

¹⁸Yèn bakal kula itung gunggungé ngliwati tyatyahé wedi; yèn kula mandek, jebul kula ijik ing ngarep-Mu.

¹⁹Duh Gusti Allah, wong duraka supaya Panjenengan entèkké, wong sing seneng ngutahké getih, supaya pada minggira sangka kula,

²⁰sing pada ora ngajèni Panjenengan, lan sing tanpa nggawé anggèné pada nglawan marang Panjenengan.

²¹Duh GUSTI, wong sing pada sengit marang Panjenengan, apa ora kula sengiti, lan apa kula ora jelèh marang wong sing pada nglawan marang Panjenengan?

²²Pantyèn pada kula sengiti wong-wong kuwi, pada dadi satru kula.

²³Duh Gusti Allah, kula supaya Panjenengan jaga lan ati kula supaya Panjenengan ngertèni, kula supaya Panjenengan dadar lan Panjenengan supaya weruh angen-angené kula.

²⁴Panjenengan supaya mriksa, apa mlaku kula nyimpang, lan gelem nuntun kula ing dalan sing langgeng!