Read Caribbean Javanese Masmur 143 Bible Online

Masmur 143 - Caribbean Javanese bible

Masmur 143

¹Masmuré Daved. Duh GUSTI, Panjenengan supaya gelem ngrungokké pandonga kula, sambat kula supaya Panjenengan rungokké! Supaya gelem nuruti penjaluk kula ing njeruhné kasetian lan keadilan-Mu!

²Panjenengan supaya aja nganti perkaran karo abdi-Mu iki, awit ing antarané wong urip ora ana sing ditemokké bener ing ngarep-Mu.

³Awit satru wis ngoyak-oyak kula lan ngeplèkké nyawa kula ing lemah, nglebokké kula ing pepeteng kaya wong sing wis mati suwé.

⁴Nyawa kula semplak, lemes ing batin kula, ati kula delek-delek ing awak kula.

⁵Kula kèlingan marang dina-dina ing jaman mbiyèn, kula ngrasak-ngrasakké marang kabèh penggawéan-Mu, kula mikir-mikir marang penggawéané tangan-Mu.

⁶Kula megarké tangan kula marang Panjenengan, nyawa kula ngelak marang Panjenengan kaya lemah sing garing. Sela

⁷Duh GUSTI, Panjenengan supaya gelis nyauri marang kula, semangat kula wis entèk! Panjenengan supaya aja ndelikké praupan-Mu sangka kula, nganti kula kaya wong-wong sing pada medun menyang kubur.

⁸Kula ing wantyi ésuk supaya krungu kawelasan-Mu, awit kula pertyaya marang Panjenengan! Kula supaya Panjenengan duduhké dalan sing kudu kula liwati, awit nyawa kula, kula angkat marang Panjenengan.

⁹Duh GUSTI, kula supaya Panjenengan owalké sangka satru-satru kula, kula ngayom marang Panjenengan.

¹⁰Kula supaya Panjenengan wulangi nandangi karep-Mu, awit Panjenengan kuwi Gusti Allah kula! Rohé Panjenengan sing apik supaya nuntun mlaku kula ing lemah sing rata.

¹¹Duh GUSTI, kula supaya Panjenengan uripké awit sangka asma-Mu, nyawa kula supaya Panjenengan entaské sangka kangèlan awit keadilan-Mu.

¹²Satru kula supaya pada Panjenengan tumpes awit kawelasan-Mu, lan kabèh wong sing ngangèlké kula supaya Panjenengan entèkké, awit kula kuwi abdi-Mu.