Read Caribbean Javanese Masmur 144 Bible Online

Masmur 144 - Caribbean Javanese bible

Masmur 144

¹Masmuré Daved. Pinujia GUSTI gunung watuku, sing mulangi perang tanganku, mulangi tarung drijiku,

²sing dadi pangayomanku lan bèntèngku, kutaku sing kuwat lan sing ngluwari aku tamèngku lan panggonan pangayomanku, sing menangké bangsa-bangsa marang pangwasaku!

³Duh GUSTI, manungsa kuwi apa ta, nanging kok Panjenengan gatèkké, uga anak-anaké manungsa, nanging kok Panjenengan pikirké?

⁴Manungsa kuwi pada kaya angin, dina-dinané kaya ayang-ayang sing mlaku.

⁵Duh GUSTI, Panjenengan supaya gelem mlengkungké langit Panjenengan, lan terus gelem medun. Panjenengan supaya gelem ndemèk gunung-gunung supaya pada ngetokké kebul.

⁶Panjenengan supaya gelem nyabetké kilat lan pada dibuyarké. Panjenengan supaya gelem ngetyulké panah Panjenengan, sak nalika pada bingung.

⁷Panjenengan supaya gelem ngelungké tangan-Mu sangka nduwur, Supaya kula diowalaké lan slametna sangka banjir tangané para wong mantya,

⁸sing tutuké ngutyapké goroh, lan sing tangané tengen kuwi tangan tengené goroh.

⁹Duh Gusti Allah, kula bakal memuji marang Panjenengan karo kidungan anyar, kula bakal ngidung masmur kanggo Panjenengan nganggo harep kawat sepuluh.

¹⁰Panjenengan sing ngekèki kemenangan marang para ratu, lan ngluwari Daved, abdi-Mu.

¹¹Panjenengan supaya gelem ngluwari kula sangka pedangé tyilaka, diowalké sangka tangané para wong mantya, sing tutuké pada ngutyapké goroh, lan tangané tengen kuwi tangan tengené goroh.

¹²Supaya anak-anak kula lanang pada dadia tanduran, sing tukul dadi gedé ing waktu enomé, lan anak-anak kula wadon pada dadia tyagak-tyagak pojoké, sing ditatahi kanggo penggawéan kraton.

¹³Gudang-gudang simpenan kula supaya pada kebaka, ngetokké barang werna-werna, wedus kula pada tambah-tambaha dadi éwon-éwon, puluhan éwon-éwon ing pangonan kula!

¹⁴Sapi-sapi kula pada bisaa okèh momotané, lan aja nganti ana sing ora dadi lan kluron, uga ora ana jeritan ing ara-ara kula!

¹⁵Rahayu bangsa sing kahanané kaya mengkono! Rahayu bangsa sing Gusti Allahé GUSTI!