Read Caribbean Javanese Masmur 145 Bible Online

Masmur 145 - Caribbean Javanese bible

Masmur 145

¹Pamuji masmuré Daved. Duh Gusti Allah kula, duh Ratu, Panjenengan bakal kula luhurké, lan bakal tansah memuji asma-Mu tekan sak lawasé.

²Saben dina kula bakal memuji marang Panjenengan, lan asma-Mu bakal tansah kula luhurké tekan sak lawasé.

³GUSTI kuwi gedé lan banget pinujiné kaluhurané kuwi ora bisa dijajaki.

⁴Saben turunan bakal ngelem-elem penggawéan-Mu, lan pada bakal nyeritakké kekuwatan-Mu.

⁵Padangé kamulyan-Mu sing gedé lan penggawéan-Mu sing nggumunké bakal kula kidungé.

⁶Wong okèh pada bakal ngabaraké kekuwatané penggawéan-Mu sing medèni, lan kaluhuran-Mu bakal kula tyritakké.

⁷Pengéling-éling kanggo kabetyikan-Mu sing gedé bakal dikabarké karo wong-wong iki, lan bakal pada surak-surak awit sangka keadilan-Mu.

⁸GUSTI kuwi kebak trésna lan welas, sabar banget lan gedé banget kasetian-Né.

⁹Kabetyikané GUSTI kuwi marang wong kabèh lan kawelasan-Né nglubèri kabèh karo sing digawé Panjenengané.

¹⁰Duh, GUSTI, kabèh sing Panjenengan dadèkké kuwi bakal maturkesuwun marang Panjenengan, lan para katrésnan Panjenengan bakal pada memuji marang Panjenengan,

¹¹pada bakal ngluhurké kamulyané kraton Panjenengan, lan bakal ngrembuk kekuwatan Panjenengan,

¹²supaya para anak-anaké manungsa pada krungu kabar bab kekuwatan-Mu, karo kamulyané semloroté kraton-Mu.

¹³Kraton-Mu kuwi kraton sing langgeng, lan pemrintahan-Mu kuwi tetep marang kabèh anak-putuné. GUSTI kuwi setia karo tembung-tembungé lan kebak kawelasan kanggo kabèh penggawéan-Né.[5]

¹⁴GUSTI kuwi dadi sing nyangga kanggo kabèh wong sing tiba lan sing jejekké kabèh wong sing ndingkluk.

¹⁵Kabèh mripat pada ngarep-arep marang Panjenengan, lan ya pada Panjenengan kèki pangan ing waktuné.

¹⁶Panjenengan sing megarké tangan-Mu, lan nglilani mareki kabèh sing urip.

¹⁷GUSTI kuwi adil ing sak tumindaké, lan kebak kawelasan ing sak penggawéan-Né.

¹⁸GUSTI tyedak karo saben wong sing nyebut marang asma-Né, lan karo wong sing sambat marang Panjenengané karo setia.

¹⁹Para wong sing ngabekti marang Gusti Allah pada dituruti kekarepané, digatèkké sambaté terus pada diluwari.

²⁰GUSTI njaga marang sak kabèhé wong, sing trésna marang Panjenengané, nanging kabèh wong duraka bakal pada dientèkké.

²¹Tutukku masrahaké pamuji marang GUSTI, lan kabèh makluk ya bèn pada tansah ngluhurké asma-Né sing sutyi tekan selawasé.