Read Caribbean Javanese Masmur 147 Bible Online

Masmur 147 - Caribbean Javanese bible

Masmur 147

¹Haléluya! Tenan betyik ngidungké masmur kanggo Gusti Allah kita kuwi, malah kuwi nyenengké lan pantes ngidungké pamuji kuwi.

²GUSTI mbangun Yérusalèm, lan nglumpukké para wong Israèl sing pating plentyar.

³Panjenengané mulihké wong sing semplak atiné, pada diblebeti tatuné.

⁴Gusti netepaké tyatyahé lintang-lintang, pada disebut jenengé déwé-déwé.

⁵Gusti Allah kita kuwi gedé lan gedé kekuwatané, kawityaksanané ora ana watesé.

⁶GUSTI nguwatké menèh para wong sing ditindes, nanging para wong duraka pada diasorké nganti tekan lemah.

⁷Pada memujia kidung maturkesuwun marang GUSTI, pada ngidunga masmur ngadep marang Gusti Allah kita karo swarané siter!

⁸Panjenengané sing nutupi langit karo mendung sing nyepakké udan marang bumi, sing nggawé gunung-gunung pada nukulké suket.

⁹Panjenengané sing ngekèki pangané marang kéwan-kéwan, marang anak-anaké gagak sing pada tyeluk-tyeluk.

¹⁰Gusti ora seneng marang kekuwatané jaran, lan marang sikilé wong lanang.

¹¹GUSTI seneng marang wong sing ngabekti marang Panjenengané, lan para wong sing ngarep-arep marang katrésnan-Né.

¹²Hé Yérusalèm, luhurna GUSTI, hé Sion memujia marang Gusti Allahmu,

¹³awit Gusti nguwati sloroké gapuramu, lan mberkahi anak-anakmu ing pangwasamu.

¹⁴Panjenengané sing nentremaké sak tanahé pangwasamu, mareki kowé karo gandum sing apik déwé.

¹⁵Panjenengané ngekèkké préntahé marang bumi, Tembungé terus ditindakké.

¹⁶Gusti ngekèki salju kaya wulu wedus gèmbèl, nyawurké ebun kentel kaya awu.

¹⁷Gusti nguntyalké banyu kentel kaya petyahan, sapa bisa tahan ngadek ngadepi ademé?

¹⁸Panjenengané ngomong, kabèh terus èntyèr menèh, Panjenengané nekakké angin, banyuné terus mili.

¹⁹Pitutur-pituturé dikèkké marang Yakub, uga pernatan-Né lan angger-anggeré marang Israèl.

²⁰Panjenengané ora nindakké mengkono karo kabèh bangsa, lan para bangsa kuwi pada ora weruh marang angger-anggeré. Haléluya.