Read Caribbean Javanese Masmur 148 Bible Online

Masmur 148 - Caribbean Javanese bible

Masmur 148

¹Haléluya! Pada memujia marang GUSTI ing swarga! Pada memujia marang Panjenengané ing nduwur!

²Hé kabèh mulékaté Gusti, pada memujia marang Panjenengané! Hé suradadu-Né, pada memujia marang Panjenengané!

³Hé srengéngé lan mbulan, pada memujia marang Panjenengané! Hé kabèh lintang-lintangé sing gemebyar, pada memujia marang Panjenengané!

⁴Hé langit sing ngungkuli sak kabèhé langit, pada memujia marang Panjenengané! hé, banyu ing sak nduwuré langit!

⁵Sak kabèhé kuwi pada memujia marang asmané GUSTI, awit Gusti ngekèki préntah, samubarang kabèh terus pada dadi.

⁶Gusti ngadekké sak kabèhé kuwi kanggo sak terusé lan tekan selawasé, lan netepké pernatan sing ora kena diterak.

⁷Pada memujia marang GUSTI ing bumi, hé ula-ula naga lan sak kabèhé segara gedé;

⁸hé geni lan udan ès, salju lan pedut, angin lésus sing nindakké tembungé;

⁹hé gunung-gunung lan kabèh puntuk-puntuk, sak kabèhé wit woh-wohan lan kabèh wit tyemara;

¹⁰hé para kéwan alasan lan kabèh kéwan, kéwan sing nggremet lan manuk-manuk sing karo swiwi.

¹¹Hé para ratu ing bumi lan kabèh bangsa, para penggedéné lan sak kabèhé pemrintahan ing ndonya,

¹²hé para jaka lan para prawan, para wong tuwa lan wong enom!

¹³Kabèh kuwi bèn pada memuji marang asmané GUSTI, awit mung asmané sing luhur, kamulyané ngungkuli bumi lan langit.

¹⁴Sunguné umaté wis diluhurké, dadi kidung pamuji kanggo kabèh wong sing ditrésnani, kanggo wong Israèl, umat sing rumaket marang Panjenengané. Haléluya!