Read Caribbean Javanese Masmur 18 Bible Online

Masmur 18 - Caribbean Javanese bible

Masmur 18

¹Kanggo juru penyanyi. Masmur abdiné GUSTI, ya kuwi Daved sing masrahaké tembung kidung iki marang GUSTI, waktu wis ditulungi karo GUSTI sangka tyengkeremané kabèh mungsuhé lan sangka tangané Saul.

²Semauré mengkéné: “Kula trésna marang Panjenengan, duh GUSTI sing dadi karosan kula!”

³Duh GUSTI, gunung watu kula, bèntèng kula lan sing ngluwari kula, Gusti Allah kula sing dadi gunung watuku pangungsèn kula, tamèngé kula, sunguné keslametan kula, kuta bèntèng kula!

⁴Pinujia GUSTI: mengkono tembungku karo banter; nganti aku diowalaké sangka mungsuhku.

⁵Aku ketalènan karo taliné pati, lan kena karo banjiré karusakan.

⁶Aku digubet karo jireté ndonyané wong mati, jireté pati ngadang-adangi aku.

⁷Sak njeruhné kangèlanku aku nyebut marang GUSTI; lan sambat marang Gusti Allahku njaluk tulung. Panjenengané terus ngrungokké swaraku sangka kratoné, lan sambatku njaluk tulung tekan ing kupingé.

⁸Ing kono bumi terus horek gonjang-ganjing, lan dasar-dasaré gunung pada horek lan gemeter, awit sangka mulat-mulaté bebenduné.

⁹Kebul kemebul sangka irungé, sangka tutuké metu geni sing ngobong, karo mawa murup metu sangka Panjenengané.

¹⁰Langit ditiungké terus medun, mendung peteng ing sak ngisoré sikilé.

¹¹Panjenengané numpak kerup, terus mabur lan ngléyang ing swiwiné angin.

¹²Pepeteng ing sak ubengé didadèkké delikané, sing dadi tarupé: ya kuwi udan sing peteng lan mendung sing kandel.

¹³Awit sangka padang sing semlorot ing ngarepé mendungé pada ilang bareng karo udan ès lan mawa murup.

¹⁴GUSTI terus gembluduk ing langit, sing Mahaluhur mbengokké swarané.

¹⁵Jemparing-jemparingé dilepaské nganti mungsuhé pada buyar, nlorongké bledèk, mungsuhé pada bingung.

¹⁶Dasar-dasaré segara terus pada kétok, lan dasaré ndonya pada kétok awit sangka bebendu Panjenengan, duh GUSTI, lan awit sangka banteré abab sangka irung Panjenengan.

¹⁷Panjenengané terus ngelungké tangané sangka nduwur, aku terus dityekel, lan dietokké sangka banjir gedé.

¹⁸Aku utyul sangka mungsuhku sing rosa lan sangka wong-wong sing pada sengit marang aku, awit kuwi kekuwatané ngungkuli aku.

¹⁹Kuwi wis pada nyegat aku ing waktu aku ijik tyilaka, nanging GUSTI dadi sèndènanku;

²⁰Panjenengané nuntun aku metu menyang panggonan sing jembar, aku diluwari awit seneng marang aku.

²¹GUSTI mbales aku miturut karo kebeneranku, mbales aku miturut resiké tanganku,

²²awit aku ngantepi enggonku mlaku ing dalané GUSTI, lan aku ora nandangi duraka marang Gusti Allahku.

²³Awit aku nggatèkké kabèh angger-anggeré lan pernatané ora tak lalèkké,

²⁴sak tindak-tandukku tanpa tyiri ing ngarepé, lan aku tansah ngedohi kesalahan.

²⁵Mulané aku diwales GUSTI miturut kebeneranku, ya miturut resiké tanganku ing ngarepé mripaté.

²⁶Kanggo wong sing setia Panjenengan uga nandangi setia, kanggo wong sing tanpa tyiri Panjenengan uga nandangi tanpa tyiri.

²⁷Kanggo wong sing sutyi, Panjenengan ya nandangi sutyi, nanging kanggo wong sing béngkong Panjenengan ya nandangi mbulat-mbulet.

²⁸Awit bangsa sing ditindes Panjenengan slametké, nanging mripat sing nyawang karo sombong Panjenengan asoraké.

²⁹Awit Panjenengan sing nggawé murupé dimar kula; GUSTI, Gusti Allah kula sing madangi pepeteng kula.

³⁰Awit karo Panjenengan kula wani ngadepi grombolan, karo Gusti Allah kula, kula wani nglumpati témbok.

³¹Nanging Gusti Allah kuwi dalané sampurna; janjiné GUSTI kuwi murni; Gusti Allah dadi tamèngé kanggo kabèh wong sing ndelik marang Panjenengané.

³²Awit sapa ta sing dadi Gusti Allah kejaba mung GUSTI, lan sapa sing dadi gunung watuku kejaba Gusti Allah kita?

³³Gusti Allah, ya Panjenengané kuwi sing nyabuki aku karo karosan, sing ngratakké dalanku;

³⁴sing ndadèkké sikilku kaya sikilé menjangan lan ngedekké aku ing pegunungan;

³⁵sing mulangi perang tanganku, nganti lengenku bisa mentèng gendéwa tembaga.

³⁶Panjenengan ngekèki tamèngé keslametan marang kula, tangan tengen Panjenengan nyangga kula, kawelasané Panjenengan nggawé luhuré kula.

³⁷Panjenengan ngekèki panggonan sing jembar marang jangkah kula, nganti polok kula ora nganti kesléo.

³⁸Mungsuh kula pada kula oyak, nganti ketyekel, lan kula ora pisan-pisan mbalik sak durungé entèk kabèh;

³⁹ya kabèh pada kula gebuki nganti ora bisa tangi menèh, pada ambruk ing ngisoré tlapakané kula.

⁴⁰Kula wis Panjenengan sabuki karo karosan kanggo perang; sing pada nglawan kula kuwi wis Panjenengan telukké ing ngisoré pangwasa kula.

⁴¹Mungsuh kula wis Panjenengan gawé pada mlayu sangka ngarep kula, lan para wong sing pada sengit marang kula pada kula tumpes.

⁴²Kabèh pada sambat njaluk tulung, nanging ora ana sing mitulungi kabèh pada sambat marang GUSTI, nanging ora disauri.

⁴³Kabèh pada kula ejur-ejur nganti lembut kaya lebu sing kabur karo angin, kula buwang kaya blétokan ing dalan.

⁴⁴Panjenengan wis ngutyuli kula sangka bantahané rayat; kula Panjenengan angkat dadi penggedéné para bangsa; bangsa sing ora kenal karo kula kuwi pada ngabdi marang kula;

⁴⁵kupingé ijik krungu kula waé, terus pada mbangun miturut marang kula; wong mantya pada sujut lan ngrapèk-ngrapèk marang kula.

⁴⁶Wong-wong mantya pada nglumpuk tanpa putyèt, lan pada metu ninggalké bèntèng-bèntèngé karo gemeter.

⁴⁷GUSTI urip! Pinujia Gunung watuku, diluhurna Gusti Allah, Juruslametku.

⁴⁸Gusti Allah sing mbales aku, lan wis menangké para bangsa sak ngisoré pangwasaku,

⁴⁹sing wis ngluwari aku sangka mungsuhku. Panjenengan malah wis ngluhurké kula ngungkuli para wong sing nglawan kula; kula Panjenengan tulungi sangka wong sing duraka.

⁵⁰Mulané duh GUSTI, kula bakal ngidungké maturkesuwun ing antarané para bangsa, asma Panjenengan bakal kula luhurké karo kidung masmur.

⁵¹Panjenengané mbales keslametan sing gedé marang ratu sing diangkat, lan ngekèki kawelasan marang sing dijebatani, ya kuwi marang Daved lan turunané nganti selawasé.