Read Caribbean Javanese Masmur 19 Bible Online

Masmur 19 - Caribbean Javanese bible

Masmur 19

¹Kanggo juru penyanyi. Masmuré Daved.

²Langit nyritakké kamulyané Gusti Allah, lan langit ngomongké gawéané tangan-Né;

³awan nerusaké kabar kuwi ganti-gumanti, lan wayah mbengi nggelarké kaweruh ganti-gumanti.

⁴Ora ana kabar lan ora ana tembung, ora krungu swarané,

⁵nanging tembungé ngenggoni sak lumahé bumi, mentyar tekan ing pungkasané ndonya. Gusti wis mernahké tarupé srengéngé ing langit,

⁶sing njedulé kaya pengantèn lanang sing ijik metu sangka kamaré, njingkrak kaya suradadu sing arep mlaku ing dalané.

⁷Waktuné sangka pinggiré langit lan mubengé tekan ing sisih liyané, ora ana barang sing ora kena ing panasé.

⁸Angger-anggeré GUSTI kuwi sampurna, nyegeraké nyawa; pernatané GUSTI kuwi setia tuhu, ngekèki kawityaksanan marang wong sing ora nduwé pengalaman.

⁹Tembungé GUSTI kuwi titis, mbungahké ati; préntahé GUSTI kuwi murni, nggawé semloroté mripat.

¹⁰Wedi marang GUSTI kuwi sutyi, lestari ing selawasé; angger-anggeré GUSTI kuwi bener, kabèh adil,

¹¹apiké ngungkuli emas, malah ngungkuli emas murni okèh; leginé ngungkuli madu, malah ngungkuli rembesé madu sangka talané tawon.

¹²Lan menèh abdi Panjenengan diélingké karo kuwi mau kabèh, lan wong sing netepi nampa berkah gedé.

¹³Sapa sing bisa ndelok sing nasarké? Panjenengan supaya gelem ngluwari kula sangka sing ora kula ngertèni.

¹⁴Abdi Panjenengan supaya Panjenengan ayomi, uga awit sangka anané wong sing pada ndugal; kuwi aja nganti pada ngwasani kula! Kula terus tetep tanpa tyiri lan resik sangka panerak sing gedé.

¹⁵Supaya Panjenengan seneng marang tembung lan angen-angen kula, lan gagasané ati kula, duh GUSTI, gunung watu kula lan penebus kula.