Read Caribbean Javanese Masmur 2 Bible Online

Masmur 2 - Caribbean Javanese bible

Masmur 2

¹Kenèng apa para bangsa pada tandang rusuh? Lan para taleré bangsa pada ngréka-ngréka sing tanpa guna?

²Para ratu ing bumi pada tata-tata arep perang lan para penggedéné bebarengan arep nglawan GUSTI lan Juru Jebat:

³“Hayuk pada medot dadungé lan mbuwang tali-taliné.”

⁴Panjenengané Gusti sing njagong ing swarga kuwi ngguyu, Gusti moyoki wong-wong mau.

⁵Terus Gusti mréntahké nesu-Né marang wong-wong kabèh, lan dikagètké karo panasé nesu-Né:

⁶“Aku sing wis ngedekké ratu-ratu-Ku ing Sion, gunung-Ku sing sutyi.”

⁷Aku arep nyritakké putusané GUSTI; tembungé marang aku: “Kowé kuwi anak-Ku! Aku sing nganakké kowé ing dina iki.

⁸Kowé nyuwuna marang Aku, mesti kowé Tak wènèhi para bangsa dadi pandumanmu, lan pungkasané bumi dadi duwèk-Mu.

⁹Kowé bakal ngejur karo gepuk wesi, bakal kok remuk kaya tyuwilané kendi.”

¹⁰Mulané, hé para ratu, pada tumindaka sing wityaksana; para rèkter ing bumi, pada gelema diélingké!

¹¹Pada ngabektia marang GUSTI karo sing ngajèni; lan karo rasa bungah lan gemeter.

¹²Ambungen anak lanangé[1], supaya Panjenengané aja dadi nesu lan kowé dientèkké ing ndalan, awit bebenduné gampang banget enggoné murup. Rahayu kabèh wong sing ngungsi marang Panjenengané!