Read Caribbean Javanese Masmur 21 Bible Online

Masmur 21 - Caribbean Javanese bible

Masmur 21

¹Kanggo juru penyanyi. Masmuré Daved.

²Duh GUSTI, ratu seneng-seneng awit sangka pangwasa Panjenengan, banget bungahé awit sangka kemenangan pawèh Panjenengan!

³Apa sing dipingini pikirané wis Panjenengan kèki, lan penjaluk sing metu sangka lambéné ora Panjenengan tampik. Sela

⁴Nanging wis Panjenengan petuk karo berkah sing lubèr; lan Panjenengan ndèkèki makuta emas murni ing sirahé.

⁵Piyambaké njaluk urip marang Panjenengan; terus Panjenengan kèki, uga wis Panjenengan kèki umur dawa ing sak terusé lan sak lawasé.

⁶Kaluhurané ngluwihi sembarang awit sangka kemenangan pawèh Panjenengan, apa waé Panjenengan kèki kemenangan karo kamulyan.

⁷Piyambaké Panjenengan dadèkké berkah ing sak lawasé; Panjenengan kebaki karo kebungahan ing ngarepé Panjenengan.

⁸Awit ratu pertyaya marang GUSTI, lan awit sangka katrésnané sing Mahaluhur piyambaké ora gloyoran.

⁹Asta Panjenengan bakal nyekel kabèh mungsuh Panjenengan, sing sengit marang Panjenengan pada bakal ketyekel karo tangan Panjenengan sing tengen

¹⁰pada bakal Panjenengan dadèkké kaya angklo murup, yèn Panjenengan ngétok, duh GUSTI. Bebenduné GUSTI bakal nguntal wong mau kabèh, lan pada bakal dipangan karo geni.

¹¹Turunané bakal Panjenengan entèkké sangka bumi, lan tyedak turunané sangka antarané para anak-anaké manungsa.

¹²Yèn bakal nggawé tyilaka sampéyan, lan ngrantyam ala, pada tanpa kekuwatan.

¹³Malah bakal Panjenengan nggawé pada mblayu kabèh, taliné gendéwa Panjenengan, Panjenengan tujokké marang praupané.

¹⁴Duh GUSTI, supaya gelem ngadek karo pangwasa Panjenengan! Kita terus pada ngidung lan memuji masmur tumuju marang kekuwatan Panjenengan.