Read Caribbean Javanese Masmur 22 Bible Online

Masmur 22 - Caribbean Javanese bible

Masmur 22

¹Kanggo juru penyanyi. Miturut nyanyian: Menjangan wédok ing wayah ésuk. Masmuré Daved.

²Duh Gusti Allah kula, Gusti Allah kula, kenèng apa Panjenengan tégakaken kula? Kula mbengok banter, nanging Panjenengan tetep adoh lan ora mitulungi kula.

³Duh Gusti Allah kula, ing wantyi awan kula sambat, nanging Panjenengan ora nyauri, ing wantyi wengi mengkono uga, nanging kula ya ora tentrem.

⁴Nanging Panjenengan kuwi sing Mahasutyi sing njagong ing damparé kidung pamujiné Israèl.

⁵Para leluhur kita pada pertyaya marang Panjenengan; pada pertyaya marang Panjenengan, banjur Panjenengan tulungi;

⁶Panjenengan sing dityeluk, terus Panjenengan gatèkké; pada pertyaya marang Panjenengan lan pada ora kewirangan.

⁷Nanging kula kuwi tyatying, duduk manungsa, dadi tyatyatané wong, dadi geguyoné wong okèh.

⁸Wong sing nyawang kula pada moyoki kabèh, karo ngèntyepi lan gèdèk-gèdèk, tembungé mengkéné:

⁹“Wong suméndé marang GUSTI, bèn dientaské karo Panjenengané, bèn Panjenengané sing ngluwari! Wong kuwi apa ora dadi senengé atiné ta?”

¹⁰Ya, tenan Panjenengan sing nglairké kula sangka wetengé ibu; Panjenengan sing ndadèkké kula tentrem ing dadané ibu kula.

¹¹Wiwit lair mila kula dipasrahké marang Panjenengan, wiwit waktu kula ing wetengé ibu kula, Panjenengan dadi Gusti Allah kula.

¹²Supaya Panjenengan aja nganti ngedohi kula, awit kasusahan wis tyedak, nanging ora ana sing mitulungi.

¹³Sapi-sapi lanang okèh sing pada ngrubung kula; kula dikepung karo sapi-sapi lanang sangka Basan;

¹⁴anggèné pada ngangapké tutuké marang kula kaya waé singa sing nubruk lan nggeruh.

¹⁵Kula diesoké kaya banyu, kabèh balung kula pada pisah sangka ros-rosané; ati kula kaya lilin, lèlèh ing batin kula;

¹⁶kekuwatan kula garing kaya beling, ilat kula kelèt ing tyetak kula, lan Panjenengan sing nyèlèhké kula ing lebu kaya wong mati.

¹⁷Awit kula dirubung karo asu, grombolané wong duraka ngepung kula, pada nyuduki tangan lan sikil kula.

¹⁸Balung-balung kula bisa kula itung kabèh; wong-wong pada weruh, pada nyawang kula.

¹⁹Sandangan kula pada diedum, lan jubah kula dilotré karo dadu.

²⁰Nanging Panjenengan, duh GUSTI, supaya Panjenengan aja ngadoh sangka kula; duh karosan kula, supaya gelis mitulungi kula!

²¹Kula supaya Panjenengan owalké sangka pedang, lan nyawa kula sangka tyengkeremané asu.

²²Supaya ngluwari kula sangka bolongané singa, lan sangka sunguné sapi alasan. Panjenengan wis nyauri kula!

²³Kula bakal ngabaraké asma Panjenengan marang para sedulur kula, Panjenengan bakal kula puji ing kumpulané pasamuan:

²⁴Hé para wong sing ngabekti marang GUSTI, pada masrahna pamuji marang Panjenengané, hé kabèh turunané Yakub, pada luhurna Panjenengané; hé kabèh turunané Israèl, pada nduwéa rasa wedi lan trésna marang Panjenengané.

²⁵Awit Panjenengané ora nyawang asor lan ora jijik marang wong sing ditindes, lan ora ngaling-alingi praupan-Né, lan ngrungokké nalikané wong mau sambat njaluk tulung marang Panjenengané.

²⁶Awit sangka Panjenengan kula memuji-muji ing pasamuan sing gedé; janji kula bakal kula bayar ing ngarepé para wong sing pada ngajèni Panjenengan.

²⁷Wong andap asor bakal pada mangan nganti warek, wong sing nggolèki GUSTI bakal ngelem-elem Panjenengané; atimu bèn urip ing selawasé!

²⁸Pojok-pojokané bumi bakal éling marang kuwi lan terus mratobat marang GUSTI; Para bangsa turun-temurun bakal pada sujut nyembah ing ngarepé Panjenengan.

²⁹Awit GUSTI sing nduwé kraton, Panjenengané sing ngwasani bangsa-bangsa.

³⁰Wong gemedé ing bumi bakal pada sujut nyembah kabèh marang Panjenengané, para wong sing mudun menyang lebu lan ora bisa nyambung uripé bakal pada nyembah ing ngarepé.

³¹Para turun-turunané pada ngabekti marang Panjenengané, lan ngabarké bab GUSTI marang para turunané.

³²Kuwi kabèh bakal pada ngabarké keadilané marang bangsa sing mengko bakal lair, awit kuwi wis ditindakké karo Panjenengané.