Read Caribbean Javanese Masmur 27 Bible Online

Masmur 27 - Caribbean Javanese bible

Masmur 27

¹Masmuré Daved. GUSTI sing dadi pepadangku lan keslametanku, sapa sing tak wedèni? GUSTI sing dadi bèntèngé uripku, sapa sing ndadèkké aku gemeter?

²Waktu para wong duraka pada nyerang marang aku arep mangan dagingku, ya kuwi kabèh satruku lan mungsuhku terus pada kejengklok lan tiba.

³Senajan okèh suradadu sing pada ngedekké tarup ngepung aku, atiku ora wedi, senajan teka peperangan, atiku tetep pertyaya.

⁴Sak perkara sing tak jaluk marang GUSTI, ya kuwi sing tak pingini supaya bisa manggon ing griyané GUSTI ing selawasé uripku, nyawang kabetyikané GUSTI lan ngrasakaké énaké ing griya sutyi-Né.

⁵Awit Gusti ngayomi aku ing tarupé, yèn ana bebaya; ngaling-alingi aku ing panggonan sing ndelik ing sak njeruhné tarupé. Panjenengané mernahké aku ing sak nduwuré watu.

⁶Saiki sirahku jejek, ngungkuli mungsuh sing ngepung aku; ing tarupé aku bakal masrahaké kurban maturkesuwun karo surak-surak; aku arep ngidung lan nggawé masmur kanggo GUSTI.

⁷Duh GUSTI, supaya gelem ngrungokké sambat kula sing kula omongké, supaya Panjenengan gelem melasi kula lan kula supaya disauri!

⁸Ati kula mèlu marang tembungé Panjenengan: “Kowé nggolèkana praupan-Ku.” Praupan Panjenengan ya terus kula golèki, duh GUSTI.

⁹Panjenengan supaya aja nutupi praupan Panjenengan marang kula, Panjenengan aja nampik abdi Panjenengan karo bebendu; Panjenengan kuwi pitulungan kula, kula supaya aja Panjenengan tampik lan Panjenengan tinggal, duh Gusti Allah, Juruslamet kula!

¹⁰Senajan bapak ibu kula ninggalké kula, nanging GUSTI sing mupu kula.

¹¹Duh GUSTI, kula supaya Panjenengan kèki pinuntun bab dalan Panjenengan, lan mlaku kula dituntun ing dalan sing rata awit sangka anané mungsuh kula.

¹²Kula aja Panjenengan pasrahaké marang hawa nesuné satru kula, awit wis ana seksi-seksi goroh sing pada nglawan kula, karo wong-wong sing kanggonan ambekan bakal nindakké duraka.

¹³Tenan aku ngandel yèn bakal weruh kabetyikané GUSTI ing buminé wong urip!

¹⁴Pada ngarep-arepa marang GUSTI! Pada kuwata lan sing tatak atimu! Pada ngarep-arepa marang GUSTI!