Read Caribbean Javanese Masmur 30 Bible Online

Masmur 30 - Caribbean Javanese bible

Masmur 30

¹Masmur. Kidung kanggo nyutyèkké Griya Sutyi. Masmuré Daved.

²Duh GUSTI, Panjenengan bakal kula luhurké, awit Panjenengan wis ngentasaké kula, lan ora nglilani yèn mungsuh kula pada bungah awit sangka kula.

³Duh GUSTI, Gusti Allah kula, kula sambat njaluk tulung marang Panjenengan, terus Panjenengan waraské.

⁴Duh GUSTI, Panjenengan wis ngentasaké nyawa kula sangka panggonané wong mati, Panjenengan nguripké kula ing antarané wong-wong sing wis mlebu ing kubur.

⁵Pada ngidunga masmur kanggo GUSTI, hé para wong sing ditrésnani, lan pada masrahna maturkesuwun marang asmané sing sutyi!

⁶Awit bebenduné mung sedilut, nanging kawelasané tetep ing selawasé urip; ing wayah mbengi ana tangisan, ing wayah ngarepké ésuk krungu surak-surak.

⁷Ing njeruhné kebungahan kula, tembungé ati kula: “Aku ora bakal gloyoran selawasé!”

⁸Duh GUSTI, awit sangka enggèn Panjenengan seneng, kula wis Panjenengan panggonaké ing sak nduwuré gunung sing kuwat; nanging bareng Panjenengan nutupi praupan Panjenengan, kula kagèt.

⁹Kula ngomong banter marang Panjenengan, duh GUSTI, lan kula ndedonga marang Gusti:

¹⁰“Apa gunané yèn getih kula kutah, yèn kula medun ing kubur? Apa lebu bisa masrahké maturkesuwun marang Panjenengan lan ngabaraké kasetian Panjenengan?

¹¹Duh GUSTI, Panjenengan supaya ngrungokké lan melasi kula, duh GUSTI, Panjenengan supaya gelem ngadek dadi juru penulung kula!”

¹²Kula sing sambat Panjenengan malihké dadi wong sing jejogètan, salin kasusahan kula Panjenengan bukak, kula terus Panjenengan sabuki karo kebungahan,

¹³supaya nyawa kula ngidungké masmur kanggo Panjenengan lan aja nganti meneng waé. Duh GUSTI, Gusti Allah kula, kula bakal ngidungké maturkesuwun marang Panjenengan ing sak lawasé.